Ådjî d' Lidje

Èn årtike di Wikipedia.
Potchî a: naiviaedje, cweri

Ådjî d' Lidje (1055-1131), kinoxhou eto come Ådjî d' Cluny eyet Algerus Magister, esteut on moenne lidjwès do 12inme sieke.

I fourit diake di l' eglijhe Sint-Bietmé d' Lidje, la k' i vna-st å monde, poy nomé (viè 1100) pol catedråle Sint-Lambiet a Lidje. I rfuza bråmint des propôzucions des evekes almands et po fini i s' retira en on covint di benedictins a Cluny (el France), wice k' i mora ddja d' ådje et tot leyant padrî lu ene reputåcion di pieté eyet di sûtisté.

I scrijha bråmint des tecses relidjeus, ey ene Istwere di l' Eglijhe di Lidje, ki s' a målureuzmint pierdou. Les pus consecantes di ses ouves k' on-z a co fourît:

  1. De Misericordia et Justitia, ene ramexhnêye di bokets del Bibe et des påtriåtches avou des comintaires (èn impôrtant ovraedje po l' istwere del lwè eyet l' dissiplene di l' eglijhe), ki srè trové dins les Anecdotes di Martene, vol. 5.
  2. De Sacramentis Corporis et Sanguinis Domini, on traité, e troes lives, siconte di l' erezeye Berengaryinne, k' a stî hôtmint ricmandé pa Pire di Cluny eyet Erasmus.
  3. De Gratia et Libero Arbitrio, diné dins l' Anecdota da B. Pez, vol. 4.
  4. De Sacrificio Missae; diné dins Collectio Scriptor. Vet. da Angelo Mai, vol. 9. p. 371.