Condoleyances
On prezinte ses condoleyances a ene sakî ki vént d’ piede on parint, on soçon.
Ça vout dire k' on s' fwait må por leye. K' on prind pårt a s' doû.
Li prezintaedje des condoleyances si fwait rålmint e walon, minme inte waloneus. Dandjreus paski l' walon a todi l' air di esse on lingaedje po raconter des couyonådes, et nén po les poenneusès afwaires.
Sôre di prezintaedjes di condoleyances[candjî | candjî l’ côde wiki]
El Walonreye[candjî | candjî l’ côde wiki]
Po les familes crustinnes, on vénrè dire si tchaplet al moirtuwaire. Udonbén on vénrè al messe d' etermint. On-z î leyrè sovint si cwåte di vizite, po mostrer k' on-z a vnou.
On pout eto scrire, u responde å fwaire-pårt del famile. On pout eto emiler.
Gn a eto des waibes la k' on pout prezinter ses condoleyances. C' est kécfeye li croke-moirt ki rcopeyrè pol famile les condoleyances k' ont stî rascodowes ladrî.
Les condoleyances si prezintèt dins li samwinne ki shût l' moraedje.
Å Marok[candjî | candjî l’ côde wiki]
Å Marok, li termene des condoleyances pout esse assez longue, disk' a èn an u deus si l' famile dimeure å lon u foû payis. Les cis ki vnèt prezinter leus condoleyances dimornut on ptit tins amon l' djin k' est d' doû. Sacwantès eures u minme sacwants djoûs, s' i vnèt did fén lon. Et l' famile k' est d' doû doet rçure li parintêye comifåt. Li minimom, c' est d' ofri do té. Å pus sovint, po les près-parints ki vnèt did lon, on frè a marinde u a soper. Dj' ô bén, on bon dinner.
Dins les viyaedjes, c' est les ôtès familes k' apoirtèt a magnî li londmwin del moirt, u padecô, troes djoûs å lon. Ey a totes les eures, a l' assulon des djins ki vnèt prezinter leus condoleyances.
Modeles di condoleyances e walon[candjî | candjî l’ côde wiki]
- Il est ddja motoit ene miete tård, mins dji v' vou sohaitî bråmint do coraedje po passer ces laids moumints cial.
- Dji pinse a vos, Lucyin; dju n' sai nin scrire grand tchoi d'adroet mins dji vs sohaite do coraedje divins cisse måle passe; ca, on-z-a bele di dire mins "ene mame, on nd a k' ene", don.
- Dj' avans stî foirt disbåtchîs d' aprinde po nosse mononke; li Bon Diu si åme !