Flûte a l' agnon

Èn årtike di Wikipedia.
Potchî a: naiviaedje, cweri

Wiktionary-logo.svg

Po des linwincieusès racsegnes sol mot "flûte a l' agnon", alez s' vey sol Wiccionaire

Flûte a l' agnon1.jpg

Ene flûte a l' agnon, c' est èn instrumint d' muzike foirt simpe, k' on fwait avou on boket d' tene bwès, disvudî e mitan, ristopé a on dbout d' ene fene pelete d' agnon, avou on trô sol costé k' on «cåze» divins po fé les sons.

Ci n' est nén èn instrumint d' muzike å vint come li flûte ordinaire, mins èn instrumint å bouxhaedje-dissu.

Fabricaedje pate à pate[candjî]

Prinde ene coxhete buzlêye (dedja vude å mitan) come del pate-d'-åwe, do cierfouy di pidjon, do bambou, di l' andjlike, do cladjot. Oubén ene coxhete di sayou disvudeye; oubén on montant d' fleur di roubåbe. Et-z è côper on boket.

Avou on ptit coutea, fé on trô po-z î mete si boke. Oudon-bén uzer l’ bwès avou ene cawe-di-rat.

Côper èn agnon... et saetchî foû li tote tene pitite foye k’ on voet åd triviè. Cisse pelete la, c’ est leye ki va dner li son si télmint a pårt d’ ene flûte a l’ agnon.

Tinkyî l’ foye d’ agnon å coron del buzete. Atincion ! I fåt ki l’ pelete dimeure ene miete rafrintcheye. I fåt leyî sacwants pleus, ene miete d’ åjhmince.

Po fé tni l’ pea å coron del buzete, i nos fåt on ptit loyén : do rafia, ene foye di cladjot, ene yebe, do lin, on boket d’ linne, do strin, do crin ou ene elastike !

Li flûte a l’ agnon est presse. Fåt leyî ene miete rissouwer l’ pea. [1]

Fonccionmint[candjî]

Po-z awè do son, on tchante tot zûnant dins l' trô. Ou adon, cåzer a spesse linwe (reper).

Avou l’ mwin ki n’ fwait rén, po fé d’ l’ efet, po-z awè on tremolo (tronnmint do son) i fåt, tocter avou l’ deujhinme doet, so l’ mimbrane del flûte.

Mins, dins tos les cas, i n' fåt nén shofler dvins. [2]

Rilomés eployaedjes[candjî]

flûte a l' agnon (fritche) ki fwait l' muzike ki shonne rexhe foû di ç' côr-brotchet la

Li soce des cwarante Molons, k' a totes sôres di droles d' instrumints, c' est des flûtes a l' agnon ki les fwaiynut aler.

Sourdants[candjî]

  1. Joëlle Spierkel Li Rantoele 70, esté 2014
  2. Joëlle Spierkel, Bosret di s' no d' famile p. 25-27.
Commons
I gn a so les cmons Wikipedia des imådjes ou fitchîs son a vey avou les flûtes a l' agnon .