Franheim

Èn årtike di Wikipedia.
Potchî a: naiviaedje, cweri

Framheim c' est l' no del båze ki l' esploreu Roald Amundsen fijha-st el Baye des balinnes, sol platea d' glaece di Ross e l' Antartike, tins di ci espedicion disk' å Pole Sud.

C' esteut-st ene cahoute fwait di bwès pa on mwaisse-tcherpetî; ele fourit fwait e seccions dismantchåves, çou ki permeta del costrure el måjhone da Amundsen el Norvedje, li dismantchî pol mete sol Fram, li batea k' amoenna l' espedicion disk' en Antartike, eyet l' remantchî on côp so plaece. Li no d' Franheim vout dire "måjhone do Fram" e norvedjin. Ci fourit onk des prumîs egzimpes di costrujhaedje aavou des bokets pré-fabrikés; li tåve po magnî si poléve riployî å plafond po pleur netyî åjheymint pa dzo leye.

Tins do costrujhaedje el Norvedje, Amundsen dijheut kel cahoute esteut po-z "observer" seulmint, çou k' aléve avou l' pordjet anoncî d' aler å Pole Nôr; mins minme èn aprindisse esploreu areut veyou k' i gn aveut des plaeces po des djins viker. Come di djusse, li pordjet da Amundsen c' esteut purade d' aler disk' å Pole Sud, la ki l' voye disk' å Pole Nôr aveut ddja stî afroyeye pa Frederick Cook eyet Robert Peary.