Gjøa

Èn årtike di Wikipedia.
Potchî a: naiviaedje, cweri
li Gjøa

Gjøa esteut l' no do prumî batea a-z aveur passé på Passaedje Nôrouwess e 1906, moenné pa Roald Amundsen come captinne eyet èn ekipaedje di shijh djins. Li voyaedje en etir dura troes ans.

Li batea, 70 pîs lon, fourit costrût e 1872 a Rosendal, el Norvedje, eyet eployî po pexhî disk' a ki, 28 ans pus tård, e 1900, Roald Amundsen l' atchtaxhe po s' endè siervi po ses esploraedjes di l' Artike.

L' ekipaedje (foû d' Amundsen lu-minme) do voyaedje ki rinda l' batea fameus, c' esteut Godfred Hansen, Helmer Hanssen, Anton Lund, Peder Ristvedt, Gustav Juel Wiik eyet Adolf Henrik Lindstrøm.

Il cwitît Oslo li 16 dji djun 1903, eyet après aveur naivyî inte li pårteye continintåle do Canada eyet l' boird nonnrece di l' Iye Victoria, li Gjøa ariva-st a Nome e l' Alaska li 31 d' awousse 1906. I naivyît adon disk' a San Francisco k' il î arivît l' 19 d' octôbe, ey esse riçûs come des eros.

Tins d' leu voyaedje, l' espedicion fjha sacwants mzuraedjes po disterminer l' eplaeçmint do pole Nôr magnetike.

Li Gjøa fourit pus tård atchté pa ene kiminålté norvedjinne-amérikinne eyet bistoké al veye di San Francisco e 1909. Låvå il a stou en espôzucion å park do Golden Gate. E 1972 li Gjøa fourit ramoenné el Norvedje, eyet i s' trove asteure el muzêye do naiviaedje norvedjin a Oslo.