Léon Degrelle
| Skepiaedje | 15 di djun 1906, Bouyon |
|---|---|
| Moirt | 31 di måss 1994, Malaga |
| Nåcionålité | Bedje |
| Activités | Politikî, gaztî, scrijheu |
Léon Degrelle (e walon Leyon Degrele) a skepyî li 15 di djun 1906 a Bouyon ey a morou li 31 di måss 1994 a Malaga.
Il a stî po cmincî, sicrijheu et gaztî. Adonpwis, il a-st enondé li mouvmint recsisse.
C' esteut l' fi da Édouard Degrelle, k' aveut ecoraedjî ès mouvmint.
Vicåreye[candjî | candjî l’ côde wiki]
Loukîz a : Recsisse
I vna å monde dins ene famile di grands catolikes. Si pa provneut d' France, et s' mame del Rotche.[1]
A l' univiersité d' Lovén, i va cmincî a scrire toplin des lives. C' est la k' i resconterrè Djôzef Mignolet.
(…)
Leyon Degrelle a stî veyou voltî di bråmint des Walons, aprume el Province do Lussimbork, dins les anêyes 1930. Et s' trovéve-t on k' i cåzéve si bén. Ses djins payént a boere ås djonneas des viyaedjes après messe.
Mins e 1937, il a eto critiké les margouyaedje ådvins do Pårti catolike. Adon, les catolikes l' ont låtchî, ey il a manké d' esse discomunyî (li doyén d' Bouyon a rfuzé di lyi dné l' comunion, todi). Après çoula, il a stî veyou evi des djins.
Tins del guere di 40, a pårti di 1941, i s' diclåre politicmint po Hitler.
Il ala come volontaire sol front rûsse.
E moes d' decimbe 1944, a l' Ofinsive da Von Rundstedt, i rivna el Walonreye, avou les Almands, al tiesse d' on batayon d' SS walons.
Après l' guere, i serè codåné a moirt. Mins on n' a måy oizou dmander si estradicion foû d' Espagne, la k' il aveut chwiné. A cåze del "påye civile" k' a shuvou l' arindjaedje des bidons après l' Afwaire Rweyåle. "On n' distere nén les viyès vatches", dijha-t on.
Adon, il a continouwé a tchåfer ses waerbeas å solea del Costa del sol disk' a s' påjhûle moirt.
Dins les belès-letes e walon[candjî | candjî l’ côde wiki]
Degrelle est rconoxhou come on mwaisse pretcheu. Vola on discrijhaedje di ses spitchs, del pene da Gusse Laloux:
- I vos petéve li francès…
- Et s' corcyî bonzet roed. Vleur come plonker les djins. Pu s' rapåjhter d' on plin côp et cåzu berdeler tot bas.[2]
Dins on powinme «Radio-Londe», ki discrît l' guere di 40, Robert Bourgeois cåze del dobleure des Nazis e l' Union sovietike (front do Levant), la k' Degrelle esteut avou l' Ledjon walone.
- Hitler a dvou prinde el poude d' escampete
- Tos ses djenerås corént-st å pus rade
- Minme Leyon Degrelle esteut dins l' tatouye
- Avou l' ledjon dins les berdouyes.[3]
Mins li pus long scrijhaedje so Degrelle, a môde di platchtaedje, est l' ouve di Djôzef Mignolet e 1937. C' est tot on live e walon di 82 pådjes eyet cénk pådjes di motlî. I s' lome Leyon Degrele, on fré.
Hårdêyes divintrinnes[candjî | candjî l’ côde wiki]
Hårdêye difoûtrinne[candjî | candjî l’ côde wiki]
Li djudjmint so Degrelle d' èn Årdinwès d' Ôtchamp (so l' Aberteke)
Sourdants[candjî | candjî l’ côde wiki]
- ↑ Djôzef Mignolet, Degrele, on fré, p. 18-19.
- ↑ A. Laloux, Li curé d' Såtô p. 68.
- ↑ Moxhon d' Ônea 5/2020, p. 19.