Li curé d' Såtô (roman)
Li curé d' Såtô, c' est on roman e walon sicrît pa Auguste Laloux. C' est l' troejhinme roman då Gusse, après «Li ptit Bert» eyet «Les soçons».
Elle a stî publiyeye dins « Vers l'Avenir » do 15 d' awousse 1967 å 23 d' djulete 1968, pårteye e 48 bokets (djusse come Pa totès stroetès voyes (roman)).
Li roman a stî eplaidî come live pa Bernard Louis e 2011, enimådjî pa Sabine de Coune.
Si spès motlî (24 pådjes), adjinçné pa l' eplaideu, rileve des mots pacô waire documintés ôte pårt. Ossu, il est rprins sol limero [C63] dins l' djivêye des motîs do walon.
Rascourti[candjî | candjî l’ côde wiki]
L' abé Matiasse, li novea curé d' Såtô, ni s' etind nén avou l' mayeur. Les Såturlins si pårtixhnut e deus clans : les cis ki sotnèt l' curé (et conte do mayeur), et les cis ki sont pol mayeur (et conte do curé). Ces-ci ont minme divnou protestants.
So ç' tins la, Manu, li fi do mayeur, a l' beguén po Mareye, li feye d' on moenneu des "sconte-do-mayeur". C' est on amour sins espwer, shonne-t i, dabôrd.
Plaçaedje dins li spåce et dins l' tins[candjî | candjî l’ côde wiki]
Li no do viyaedje rishonne a Såtoû, mins ci sereut purade on viyaedje do Condroz ou … Dorene.
Li roman cmince divant l' guere di 40, å moumint ki les recsisses kimincént a s' mostrer. On djåze di Leyon Degrele.
C' est l' egzôde di 1940, ki, al fén des féns, va fé candjî li destinêye des persounaedjes.