Paskeye so les lotchets

Li «Paskeye so les lotchets» ou «Les lotchets des cmeres d' asteure», ki l' tite e francès, c' est : «Discours de paysans sur le tremblement de terre et sur les lochets des filles d’au présent», c' est ene viye paskeye di 1640.

C' est l' limero 2 do live «Dix pièces en vers sur les femmes et le mariage», eplaidî pa Jean Haust e 1941.

Elle est rprinjhe sol limero 285 dins l' clasmint Piron des vîs scrîts e walon.

Dataedje

On l' date di 1640, paski, li 4 d' avri di ciste anêye la, gn a on foirt hosmint d' tere a Lidje.

Persounaedjes

• Wéri Lodî
• Maroye Modêye, si feme
• Stienon Hamlé
• Robin Crespou, si pa

Contnou

Gn a troes bokets dins l' paskeye, ki n' ont waire d' aloyance inte di zels.

N a des strofes etires k' ont stî rcopeyes di des ôtès paskeyes di ç' trevén la.

Prumî boket

Vers 1 a 35 Les troes omes, c' est des houyeus, ki sont-st å fond tins do tronnmint d' tere.

Wéri si date a sinte Båre et a sint Linåd.

O! K' est ç' voci, Djezus Maria!

Sinte Båre et Monsieu sint Linåd!

Nos alans abimer el fosse.

Binamé Diè! Tot l' beur ki hosse!

Stienon Hamlé dit årvey a s' monkeur

Ay! Adiè, binamêye Aguisse

Nos n' årans pus måy nole divize.

Robin Crespou sondje å schapaedje di si åme.

Doûs Diè! Ki n' estans ns kifessé.

Et k' nos euxhénxhe bén fwait nos påkes.

I savét rmonter

Bouxhans nos tertos e panî.

Li hosmint d' tere si djoke.

Coraedje! I gn' a pus rén ki hosse

Vo les la foû do beur.

Gråce a Diè! Vo nos ci å djoû.

Deujhinme boket

Vers 36-42 Wéri toume dins les bresses di s' feme ki l' a vnou rawårder.

Troejhinme boket

Vers 43-162 Bate di dvize inte li pa et s' fi, avou, å mitan, on long pretchaedje sol môde des båsheles di veye, ki leyèt des grands tchveas avou des lotchets (adon k' les båsheles des viyaedjes les haetchèt dandjreus e-n on topet.

Si vos les vlans on pô lofer, (=rabressî)

I vénrè des måssîs poyaedjes

Ki vs vénront voler e vizaedje

Oubén el boke po vs sitronner.

Kî våt ene båshele di viyaedje !? (= n' a nole del veye ki l' våt)

Vos les båjhîz so leu vizaedje.

Si n' estoz vs a rén ecombré

Insi k' a ces paneas dguizés.