Soce nén recwårlante

Èn årtike di Wikipedia.
(Redjiblé di SNR)

Ene Soce nén recwårlante (kel sigue, c' est S.N.R.), c' est ene trope di djins ki s' metnut a soce, mins nén po wangnî des cwårs.

On lome afeye eto SNR des soces, nén loyeyes a des govienmints, ki boutèt po rén pol diswalpaedje do Tîce-Monde, les Soces nén loyeyes a on govienmint (SNLG).

Li SNR est diferinne del Societé Sins No d' Djin et del Societé d' Djins Responsåves e Pårteye ki, ambedeus, sont metowes so pî po rfé des çanses.

Mwaissès piceures[candjî | candjî l’ côde wiki]

Ene Soce Nén Recwårlante doet aveur des statuts, ki sont-st eplaidîs å Moniteur. Ele pout eto prinde des rîles divintrinnes.

Gn a des ptitès SNR dins l' dominne del tuzance et so spôrt, et des grossès come les ospitås publiks, metans.

Ene SNR est compôzêye d' ostant d' mimbes, pol moens 5, ki c' est les cis (les cenes) k' ont payî leu scot po l' anêye. C' est les mimbes soçons. Gn è pout eto aveur des djins ki sont mimbes, sins payî leu scot, mins pask' i soçnêynut avou l' soce : c' est les mimbes soçneus.

Ene SNR est moennêye pa on prezidint (u ene prezidinte), onk u sacwants vice-prezidint, on peneu (u penleu, u poite-ploume, u secretaire), et on cwårlî. C' est les Mwaisses Moenneus (Consey d' administråcion).

Ene soce nén Recwårlante doet rapôuler ses mimbes on côp par an, en on mwaisse-raploû. On-z î dene on rapoirt des ovraedjes et on rapoirt des contes. Li rapoirt des contes est sometou å vôte des mimbes ki sont la. Il est aveuri pa on aveurixheu d' conte. Les aveuris contes sont rashious å tribunå d' prumî schalon do sidje sociå del SNR.

Li lwè so les SNR a stî candjeye diviè 2002, po-z espaitchî les frawtinaedjes dins les caisses des grossès SNR ki bresnut des miyons. Li novele lwè est pus stragne kel viye.