Soûmagne

Soûmagne est ene comene di Walonreye, el province di Lidje.

C' est eto l' no d' on rixhot ki passe avåla.

eplaeçmint del comene el province

• Dimorants: 14.866 (2002), Soûmagnåds, Soûmagnådes.
• Limero del posse: 4630 (vî limero 4634)
• Limero diyalectolodjike: L 95
• Arondixhmint: Lidje
• Sipotaedje:
• Sitindêye: 27,22 km²
• Dinsité: 546,14 djins/km²
• Ban d' Soûmagne: Soûmagne avou Åyneu, Cerexhe-Heuzeu, Evgnêye, Mélin, Mitchroû, Tegnêye
• Hamteas d' Soûmagne: so Bwès-l'-veke, a Fetchî, sol Maireu, Rafhé, å Vevî, Werdjîfosse.
• Nos di des plaeces di Soûmagne: e Bådrihåye, sol Ladrêye, so li Rneubwès, li Tier Magnri.

Li comene di Soûmagne est vjhene des comenes di Blegneye, Fléron, Heve, Ône, eyet Trô. Ele est sol grande voye Lidje-Vervî-Åxhe, et bråmint d' djins di Lidje ou d' Vervî s' î vnèt astaler.

L' etimolodjeye do no vént d' on bodje gayel "sulm" (noeråte, bôjhleuse tere). Vîs scrijhas: Solmania (915), Soumagne (1264).

Istwere

Li pus vî tecse ki djåze di Soûmagne (lomé Solmania adon) c' est on papiscrît do 25 d' awousse 915 wice ki Tchåle li Simpe, rwè des Francs, dinéve å Prince-Eveke di Lidje on bwès ki dvant çoula fjheut pårteye di Teus.

Industreye ey agriculteure

Del fén do 19inme sieke disk' ås anêyes 1960, i gn a-st avou des hoyires; ey ene coperative.

Dispoy adon, les terisses s' ont rascovrous di verdeure; oudonbén on-z î a costrût des lotixhmints d' måjhones, ou des grands botikes.

On trove enute totès sôres di ptits comieces et di ptitès industreyes.

Mins li comene a dmoré cinsrece eto, avou 60 % des teres ki sont cultivêyes.

Culteure eyet tourisse

Dispoy les anêyes 1970, li Cinte culturel et des dijhinnes di groupes diswalpèt ene sipitante veye culturele.

A vey:

• Li dominne provinciå di Wedjimont
• Li festival di muzike country, tos ls ans, a Cerexhe-Heuzeu.
• Li Muzêye del Veye do Peupe, ki mostere li vicaedje d' ene famile ovrire do cmince do 20inme sieke.
• Li viye hoyire des Bas-Bwès et s' belfleur, k' est ouy on park po s' pormoenner, djouwer, fé on fornea...
• Li viye voye 38 di tchmin d' fier, divnou on foirt bea ravel
• des bastimints temons do Payis d' Heve.

Difoûtrinne hårdêye

Waibe del comene di Soûmagne (avou des pådjes e walon)