Uzeu:Jacques desmet

Nwêr dë Gayète

Ë-n-a yë on côp ; c’èst come ça qu’èle s’èdaumenèt todë. Ë-n-a yë là dès-ans èt dès razans, lë fë d’on gros nantë quë d’meuréve dins l’ grande cinse dë s’ pa ! On bia raupin : one pia come dè lacia, èt one caume, nwêre, mins adon, nwêre come one naît sins lëne èt sins stwèles. Nos l’avîn’ spoté : « Nwêr dë Gayète » Ë vëkéve rafurlé dins one grande tchambe pa d’zo lès panes. Lë fëgnièsse dè l’ bawète èstot spiyîye. Le bîje sofléve tant d’a l’uch, tote lë djoûrnéye èvou dès « Woû, woû ! » qu’ë n’ savot s’èdwârmë. Dè l’ djoûrnéye quand l’ solia lëméve, ë s’achidéve pa d’vant lë bawète, po rawaîti lès mouchons, lès-arondes à l’ tchèsse aus moches, èt tot l’ amia èvou sès maujones dë blankès pîres, cossèméyes, racwètîyes, autoû d’ l’èglîje come one nîtéye dë poyons pa d’zo one covrèsse. Dins l’ tchambe dë d’zo, c’èstot l’ cëne dë s’man èt dë s’ novia bia-père : lë cinsî « Grossepanse ». Së s’ mame èstot djintîye au d’la, mins s’ bia-pére, lë, avot on mënâbe caractaîre. Ël avot l’ diâle è s’ capotëne. Por lë, « Nwêr dë Gayète » comptéve po dè l’ pouchêre. Cèst po ça qu’ë l’ oblëdjéve à vëker dins l’ grande tchambe, fëne frwède. Èt, l’ gamin në s’ savot pormwinrner quë dins l’ côrtë rèssèré pa one baurîre dë fiêr avou on loquet. Ë n’avot jamais stî au bwès, èt nin co dins l’amia ! C’èst come ça qu’ « Nwêr dë Gayète » à vëké dès-ans au lon. Ël avot crèchë come tot l’ monde. Audjoûrdë c’èstot on fèl gayârd, stokasse, laudje dès spales. Lë vî cinsî qu’atrapéve dë l’âdje, èdauméve à-z-oyë peû d’ lë… Lë djoû dès dîj-ut ans dè l’ djon.ne ome, lë cinsî « Grossepanse » a grëpé lès montéyes djësqu’adlé l’ gamin po lî causer, èt lî dîre « Dëspôy saquants samin.nes, ë-n-a one plauque qu’a tchaît dins tot l’ amia. Lès-ovrîs dè l’ cinse l’on-st-atrapé. Vos n’ p’loz pës d’ d’mèrer vécë èvou vosse mame èt më, pace quë, së nos l’avans d’djà, nos pourîn’ bén vos l’ donner » Grossepance racontéve dès faloutes. Nwêr de Gayète èl sintéve. Quî qu’arot p’lë li d’né, à lë, quë vëkéve mièrseû pa d’zo lès panes dë crèsse. Tot ç’ qu’ë v’léve, c’èstot qu’ Nwêr dë Gayète s’ènn’-èvôye po todë… Nwêr dë Gayète n’avot waîre dë loques. Ël a prins l’lîve quë lîjéve po l’ momint : « L’amour au timps dè l’ coronavîrus’ » Ël a stî dîre à r’vwêr à s’ man. Èlle a tchûlé sès-ouys tot foû. Èlle èstot malèreûse, mins èlle avot peû dë s’-t-ome. Èlle a dmeuré sins motë. Nwêr dë Gayète à tchûlé èto, c’èst pèsant d’ènn’-alé to laîyant s’ man së l’ costé. Mins ë s’a sintë bënauje dë polë vëker lon èri dë s’ bia-pére, èt fou dè l’ frwède tchambe èwou quë l’èstot rèssèré. Pêlon, lë cûjeûse qu’ë lî fiéve sès plat’néyes, lî avot plafoné d’ bûre dès mëtches dë pwin po s’ vôye : dè l’ bolète au lacia d’ gade, on d’mé mète dë trëpe à l’ djote, one pëtëte botâye d’aîwe èt saquants poumes. Quand l’ grande pwate dè l’ cinse s’ r’ssèré padrî lë, ël èstot fén bënauje. Ël a d’nalé viès l’ bwès qu’ë vèyéve dë s’ prîjon pa l’ bawète dë d’zo l’ sovronde. Ël a ascauchî, ascauchî, djësqu’à l’ naît. Quand l’ solia à bachî pa d’zeû lès aubes, ë s’a achîd po mindjî sès tâyes dë pwin. Ë s’a coukî d’ssër-on lét d’ mwâtès fouyes qu’ël avot ramoncelé quand lès prëmënès stwèles blawtënîn’. Ë s’a èdwârmë come on sot-dwarmant, sins s’ dëspièrter, tot ‘squ’ à l’ pëquète do djoû. Ë n’a minme nin ètindë lë këch’léye dë pourcias-singlés qu’ a v’në oudé dins s’ satch dë twèle èvou s’-t-amindjî ! Après s’avë r’nètî èt r’laver sès dints èvou l’ botâye d’aîwe, ë l’ a r’dèmaré tot muselinant one tchanson quë s’ man lî tchantéve quand ë n’avot co pont d’âdje ; « On djoû më rin.ne vaîrè, on djoû èle më dirè… » Ël a asplâné tote lë djoûrnéye, asplâné, asplâné… Ël a coudë dès meumeûres èt sëcî dès fëstës d’ yèbes po rapaujî s’ fwin. À l’ vièspréye , ël avot tchaît d’ssë l’orère. Dë d’ vélà, ë-n-avot pës waire po-z-arëver au p’tët vëladje qu’ë razouyéve d’au lon dë s’ bawète. À l’èdaume do vëladje, on pëkèt d’ bwès èvou one pancarde : MÉLIN : « Së t’ès bon, nos t’ rawaurdrans, së t’ès mwaî nos t’ rëtchèsserans ! » Nwêr dë Gayète n’avot rén à r’dîre à ça, ël î a abroké sins taurdjî… One seûle vôye dins l’amia, dès p’tëtès maujones dë chakes costés. Au d’bout : on pës grande èvou one pancârte plaquéye dëssë l’ëch. « Dins nosse maujone, ë-n-a one grande tchambe po l’ prëmî quë vairè ! Së vos avoz è l’ëdéye dè bouter one miète po nos d’ner on côp d’wins : c’èst vos quë l’ârè ! » « Tot jësse cë quë dj’ vouro bén » s’a-t-ë dët nosse chëminaud. Ël a bouchî : pont d’ rèsponse… Ë s’a achîd, s’èssokter, èt ël a stî dëspièrté par one tchanson… « É, Ô… É, Ô… » È v’là-t-ë ni qu’ sèt blanke-dames arëvîn’ è tchantant. Nwêr de Gayète, së d’mandéve qwè ! Éstot ç’ dès blanke-dames ? ou ni ? Élle èstîn’ moussîyes èvou dès drôles dë moussemints fén blanc. Dès cotes quë d’chindîn’ jësqu’à leûs pîds, dès blouws wants jësqu’à l’ plôyan d’ leûs brès èt on mas’ po bén catchî leû nez et leûs lèpes. Quand èlle l’ont vèyë, èlle ont taurdjî à deûs mètes. Lë prêmëne lî a d’mandé comint qu’on l’ louméve. Lë deûzyinme, d’èwou qu’ë v’néve. Lë trwèzyinme poqwè qu’ël èstot là. Lë quatryinme, s’ë v’léve lë tchambe. Lë cénquyinme, s’ë n’avot pont d’ croque. Lë chîjyinme lî a èmantchî dins s’ nez, on drole dë p’tët fëstë èvou dè l’ wate au d’bout. Lë sètyinme à faît bagnî lë p’tët fëstë dins on tiyau d’ vère èvou dè l’ drogue. Tortos on taurdjî d’ ragadèler deûs mënëtes. Adon, Chovion, come on louméve lë sètyinme, à r’ssatchî l’ fëstë foû dè l’ tiyau, èt l’ razouyî d’au d’zeû d’ sès lënètes : « C’èst bon, vos n’avoz pont d’ plauque. Vos p’loz v’në vëker adlé nos, èt come c’èst l’ prëmî djoû ; ë-n-a rén à fé ! » On côp qu’ël ont tortos stî dins grande place, lès blanke-dames on r’ssatchî leû mas’ : c’èstot dès sougnantes ! « Quén chance ! » qu’ë s’a dët Nwêr dë Gayète, « Là quë dj’ vas yèsse bënauje vécë ! »… Ël a dwârmë d’ssë sès deûs-orâyes. Lë lèddemwin quand ë s’a r’lèvé, on n’ârot soyë ètind one moche zûner dins l’ maujone. Dëssë l’ tauce dè l’cujëne, ël a trové totes lès chwèles qu’avîn’ sièrvë po lë d’djëner. Et co on p’tët papi scrît par one dès sougnantes : « Bondjou ! Nwêr dë Gayète, nos-ènn’-alans tortotes po bouter tot timpe ! Vos avoz tot ç’ qu’ë v’ faut po vosse dëdjëner. Volà l’ lësse èvou tot ç’ qu’ë-n-a à fé : r’nètî lès bëdons, lès r’mète à leû place dins l’ grande drèsse, r’laver l’ careladje à grandès-aîwes, r’fer tos lès léts. Après vos-iroz aus-oûs dins l’ poulî èt à l’ salade è djârdén. Vos trov’roz co nos manètès loques dins l’ banse dins l’ laverîye. Vos-îoz lès r’nètî dins l’ Gobtindje èt lès stinde au solia së l’ rëmouye po qu’èle souwenèche. Adon, vos pouroz vos r’pwâser. Vos-aprèstéyeroz nosse soper po quand nos r’vaîrans aviè sèt-eûres. Boune djoûrnéye, quë tot vos vauye bén ! » C’èst come ça qu’ Nwêr dë Gayète à passé on mwès adlé lès sougnantes. Ë boutéve tant quë p’léve èt yèsse bënauje ! On djoû ; Chovion quë lî chonéve yèsse lë maîsse dè l’ pèkéye, l’a ataurdjî : « Volà, lë plauke èst quauzë-st-èvôye. Nos alans yë one miète mwins d’ovradje èt tot l’ monde va p’lë r’moussî foû dë s’ maujone. » Lë lèddëmin tot timpe, Nwêr dë Gayète a ètindë claper dès chabots. Ël a coûrë d’ssë l’ vôye : c’stot one bèle djon.ne fèye, tote moussîye dë blanc sër on blanc tch’vau. Së man lî avot bén dët qu’on djoû s’ rin.ne vaîrot ! Ël a rabrèssî lès sèt sougnantes, èt sauteler à crëpion së lë d’drî d’ lë tch’vau padrî s’ bèle comére… Ë s’ont mètë à min.nadje… èt… èt… Po bén vos l’ dîre : ë-n-a ni onk quë sârot vos l’ dîre, cë qu’ël ont faît après !

Maujeni !