Årmonak des vraiys Aclots po 1924 (live)

Armonak des vrais Aclots pou l'an dè grace 1924

L' Årmonak des vraiys Aclots po 1924 (Armonak des vrais Aclots pou l'an dè grace 1924), c' est on live sicrît anonimmint a môde d' årmonak ey eplaidî på ceke walon «Li Peron d' Nivele» (Le Perron nivellois, cercle wallon) e 1923.

Come gn a la 366 espots, onk po tchaeke djoû d' l' anêye (c' est ene anêye bizete), li live a rçû on limero d' rahoucaedje po les lives di spots walons, li SpO40

Contnou

• 14 pådjes sins limero: riclames e francès po des societés d' Nivele.
• p. 1: coviete divintrinne, avou l' pris (deus francs).
• p. 3 a 6: Adviertance, sinêye «V.» et ki djåze di sudjets politikes (rilåcions avou l' Almagne, dimande des Flaminds d' eployî l' neyerlandès) ossu bén ki des noveles del soce (uzaedje des cwårs di l' årmonak di dvant, concours di fjhaedje d' on motlî).
• pp. 7 a 46: årmonak, avou po tchaeke des 366 djoûs (* li no do sint fiesti, e walon, et dire ké sint patron k' il est; et * on spot e walon); al fén d' tchaeke moes, des conseys po les cotlîs.

Kékes espots trovés ådvins

C' est sovint des spots u des pinsêyes k' on n' ritrove nén dins les ôtes lives di spots walons.

• i n’ a nén si bele rôze ki n’ finit pa flani
• Li bouneur est dins l’ air; i n' voet nén beacôp so ké tiesse i va tchaire
• Boune rilomêye våt mî k’ cinteure dorêye
• tchaeke gros sô a s’ tiesse eyet s’ lete
• Les fôs edvintèt les môdes eyet end a ene contrumasse po les shuve
• Li ci ki n’ fwait rén ni pout må d’ s’ abuzer
• li ci k’ a peu des foyes n’ a nén dandjî d’ aler å bos
• c’ est l’ feme ki fwait l’ ome <> Li ci ki bate si feme wangne ès paradis
• Li ci ki sait govierner s’ linwe afrankit s’ tiesse
• ene pitite plouve abat on grand vint