Berdelaedjes (forom éndjolike)

Èn årtike di Wikipedia.
Aller à la navigation Aller à la recherche

Kin’napadje 1

Fonderîes Mélotte. Costé dèl parking dès-autos dès dirècteûrs. Dîre qui l’en d’dins èst grumî d’ camèras po waîtî s’i-gn-a pont d’ baligands qu’abrokenut. Èt qu’on-a yeû qu’one chaléye baurîre à zoupeler po p’lu machurer leû d’vanture à façâde. Méyenut, l’eûre dè régler sès comptes. - Done mi cor-one bombe di rodje ! - C’èst l’ dêrène, dispêtche tu ! dji djale ! On fél plaîji pwârtéve Silvin Pëloso. Asteûre, c’est lès veûy èvi qu’i fieûve dispôy qu’il avîn’ anoncî qu’ l’ usëne aleûve sèrer po d’naler yèsse rimontéye è l’Èspagne. Li râje boleûve dins sès vwin.nes. Li, qu’aveût d’dja d’vu viker li fén dès mines à tchèrbon. Qu’aveût d’vu chômer dès-ans divant di r’trover d’ l’ovradje, véci à l’ usène Mélotte, volà qu’i s’ritroveûve barakî tot-ute yinte lès mwins dès cias què lî avîn ridoner l’ausse di mia viker. - Si r’trover pus bas qu’ têre cor on côp ! Â nèni, i mè l’ payeront. Maugré l’ djaléye què lî d’neûve di l’ongléye, il aspouyeûve à mwârt su l’ boton dèl bombe à rodje… èt lès-afronts courîn’ su lès murâyes. Co deûs minutes èt Tonio D’ambrousco aveût racouru èt l’ gougnî : - Èt qwè ? T’as bén rade faît ? - Oyi, cès d’mé-cougnîs là, ènnè sèront quite di r’laver leû façade. Dj’a tot machuré come tu m’as dit dè l’ fé ! - I faut qu’i pâyenuche ! On va waîtî à vos r’trover d’ l’ovradje : qu’il ont dit ! Lès pourîs ! Ça faît chî mwès qu’on pwinte. Silvin a r’loukî on dêrén côp s’-t-ovradje al lumîre di s’ lampe. Des tags t’t-ossi laudjes qui dès wagons di tch’min d’ fiêr. On toûrmint po lès cravates èt lès blankès paumes dès envèlopes di fén d’ mwès à chî chifes. Si keûr a manqué d’ taurdjî quand il a vèyu l’ fin d’ l’andèle : « Solia, t’ènn’as pus po longtimps ! » Silvin ! Tant qu’a fé, tu p’leûves mète ti signature ! T’ataques nosse dirècteûr di l’ONEM, i sâront rade qui c’èst nos-ôtes qu’avans r’blankî l’usène à nosse môde ! I n’auront wêre à cachî. - Ratinds one miète, on d’mère à Chalèrwè ! Avou tos lès-ovrîs qu’il ont mètu à pîds, i n’âront… - Rèface mi ça tot d’ sûte ! - T’as vormint l’ ku strwèt, dji n’a pupont d’ coleûr. - Boudje tu ! Avou ç’ qu’i-gn-aveûve co dins lès bombes, il a polu r’catchî lès scrîjadjes què lès-arîn’ yeû vindu. Tonio à soflé : « Corèdjî ! T’èsteûs trop mwaîs qu’ po t’ soyu rasténre ? » - Djè l’ veû èvi. Djè li freû ravaler s’ cravate di râje chaque côp qu’ djè l’ veû ! Dj’ènn’a plin lès guètes di couru èt d’ fé tos lès-uch po trover d’ l’ovradje. Chaque côp i-gn-a one chîléye di man’dâyes qui s’ mougnerîn’ lès pègnons d’ leûs-orâyes po-z-awè l’ seûle place qu’i-gn-a, èt ça n’ rote jamaîs ! - On-î ariverè, dji tè l’ dis, mins tot ratindant, i nos faut fé l’ gros dos. Alê, on pète èvôye ! Il ont r’passé l’ baurîre co pus rwèd qui l’ vint d’ bîje. Rabroké à yute dins l’ 203, il ont drovu one canète di bîre. - Damadje d’ènn’arivé là, mins bon, à t’ santé ! Il ont t’nu leû linwe sins moti. Lès mwaijès sovnances rimontîn’. Pupont d’usène, pupont d’ovradje, one tène envelope à suçî. Li Noyé sèrè co pus tène, lî. Faute di bûre, on mougne dè stofé ! - S’on-z-èrireût pas lès-éyoliènes, i-gn-a pèrson.ne su cès novèlès vôyes là. Dji poureû rôler rouf-rouf po fé passer tot ç’ qu’on-z-a è nosse tièsse. - Ça n’ mi va nén d’ trop. Dji n’a jamaîs vèyu voltî d’ couru come on sot… - Alê ! Laî m’ fé, po mostrer qu’à trinte ans, on n’èst nén co mwârt. L’auto à dèmaré come po-z-aler d’ssus Auve. Quausu yute d’ Èrnadje, èle a prind à drwète su l’ vôye di r’mimbrimint èwou qu’ lès molins à vint tournîn’ à fé d’ èlèctricité. Silvin aveût r’trové sès dîj-ut ans, il a spotchî l’ pèdale à fond. L’auto à choré, todi pus rade, sins lampe, po passer d’vant l’ cayute dà Alèksandre raqwètîye dins l’ toûrnant. Cint quarante, li long do p’tit bwès, cint swèssante al tayète, l’idéye dè yèsse pus fwârt qui tot, èfoufî, rouf-tot-dju… Èt l’arocadje, one croque à n’ nin crwêre…