Camilo Cienfuegos

Èn årtike di Wikipedia.
Foto da Camilo Cienfuegos, e coleur.

Camilo Cienfuegos Gorriarán (6 di fevrî 1932 - 28 d' octôbe 1959), fourit-st on revolucionaire cubin, i pårticipa dins les activités siconte do dictateu coubin Fulgencio Batista eyet ourit on role foirt important dins l' Revolucion cubinne.

C' est onk des pus cnoxhous k' ont fwait cisse revolucion, avou Fidel Castro eyet Che Guevara.

Vicåreye[candjî | candjî l’ côde wiki]

I n' pårticipa nén di l' assôt do cazer Moncada e 1953, la k' il ebague ås Estats-Unis.

E 1955 il est aresté, eyet dispoirté viè Couba.

Adon i s' mete dins les revoles des studiants siconte di Batista, eyet est acsû pa ene bale. E 1956 il est aresté et boreaté, poy i rva åzès Estats-Unis, et, did la, å Mecsike.

Tot d' shûte après, i rdjond li ptit groupe ki Fidel Castro meteut so pîs po l' espedicion do Granma.

Après l' acoistaedje a Alegría de Pío, il arive a griper l' Sierra Maestra, li grande tchinne di montinnes ki triviesse l' iye di Couba, eyet radjonde les ôtes mimbes di l' espedicion. E 1958 il est lomé comandant, eyet ezès moes d' avri et may del minme anêye i cmande ene trope ki dschind des monts el plinne di Bayamo.

Divant l' siconte-ofinsive di l' årmêye da Batista i rtoûne dins les montinnes, eyet, on côp l' siconte-ofinzive batowe, Fidel Castro lyi dene li mission di fé ene ofinsive disk' al province di Pinar del Río, çou k' i fwait, avou l' deujhinme colonne “Antonio Maceo, eyet ariver al mwaisse-veye del province li 7 d' octôbe.

On côp l' Revolucion prindant l' pouvwer, i dvént mimbe do Hôt-Comandmint d' l' årmêye, eyet combate les solevmints siconte-revolucionaires dins l' årmêye.

Il ourit eto on role foirt impôrtant dins li rfoime agraire, eyet participer dins des raploûs d' ovrîs et d' payizans, minme divant l' fén del guere, come les 20-21 di decimbe 1958 al Conferince Nåcionåle des Travayeus do Souke, adon k' i cmandéve li deujhinme colonne.

Il esteut d' ene famile d' anarchisses espagnols, eyet veyou foirt voltî des djins po si simplicisté eyet si sorire, çou ki lyi dna li spot di Comandant do Peupe.

E moes d' octôbe 1959 il est evoyî a Camagüey, po disfé on solevmint da Hubert Matos; c' est tot rivnant di Camagüey viè Li Habane, li 28 d' octôbe, ki si avion disparexhe el mer. On cweraedje a stî fwait do côp, mins on nel ritrova måy.

Mins nerén, les cubins siconte do govienmint d' Couba, copurade les cis ki vikèt ås Estats-Unis, dijhèt sovint ki ça sereut Fidel Castro kel åreut fwait touwer; mins i n' a rén ki vegne acertiner cisse rumeur la. Eto, i gn a des cis ki pinsèt ki ça pôreut esse èn ôte complot, mins del CIA, k' åreut bouxhî djus l' avion; les cis ki pinsèt çoula el fijhèt sol soûmint des nombreus atintats siconte des revolucionaires k' on pårticipé al guere siconte do dictateu Batista (ki rçujheut des aidants del CIA).