Cawete -isse 2
Li cawete -isse 2, c' est ene cawete copieye di calcaedjes do francès, leye-minme copieye do latén, po des noûmots k' ont aspité bråmint a cmincî do 19inme sieke : «anårtchisse», «socialisse», «comunisse», «terorisse», «estremisse», «rweyalisse», «ciclisse».
Li cawete -isse est omofone d' ene ôte cawete -isse, sovint po des plaeces, et veyowe do mwais costé («flaxhisse», «frexhisse», «tchinisse»).
Sourdant[candjî | candjî l’ côde wiki]
E walon, di cåze do displouctaedje des dobès cossounes å coron, les deus cawetes francesses -isme et -iste dinèt ene seule cawete : -isse.
Li cawete -isse 2 a si bén stî ascoyeye e walon, k' elle a rsiervou po des noûmots nén calkés do francès : «fotbalisse», u avou on candjmint d' sinse e walon: buralisse». Mins il egzistént motoit e minme tins e francès d' Beldjike.
Eployaedje del cawete -isse 2 e walon d' ouy[candjî | candjî l’ côde wiki]
Les scrijheus n' ont nole eguegne po-z eployî li cawete -isse po les mots ki s' sicrijhnut avou -iste e francès.
Mins po les mots avou isme, c' est pus rujhûle. Bråmint des scrijheus wårdèt li scrijha "-isme", mågré k' i n' est nén prononçåve dins l' fonolodjeye classike do walon.
Portant sacwants motîs walons dinèt "-isse" a tot côp bon :
- Motî d' Bastogne : ciclisse (cyclisme)
- Motî da Haust : sôciålisse (social, -iste, -isme)
Les ôtes (Motîs do Coûtchant walon, Motî d' Nivele, Franwal di Nameur tapnut l' côp foû : i n' dinèt rén po "comunisme" u "socialisme".
Adon, po on stîle rissintou come pus "peur", on årè ptchî di replaecî li mot avou -isme på mot avou -iste.
- Li comunisse (fr. le communisme) a fwait bråmint do bén, mins eto bråmint do må.
serè replaecî pa
- Les comunisses (fr. les communistes) ont fwait bråmint do bén, mins eto bråmint do må.
Noûmots d' lanawaire[candjî | candjî l’ côde wiki]
Les noûmots po replaecî l' cawete -iste si front spontanêymint des cåzeus et scrijheus.
Les noûmots po replaecî l' cawete -isme divront esse ehåyîs, et spårdous pa les rfondeus : «crustinnisse», «payinnisse», «islamisse», «atletisse».
Hårdêye difoûtrinne[candjî | candjî l’ côde wiki]
Sacwants sustantifs avou l' cawete -isse 2 (dedja studyîs sol Wiccionaire)