Codånaedje del sovnance

Damnatio memoriae

famile da Septime Severe avou l' vizaedje da Gueta k' a stî martoké evoye

Li codånaedje del sovnance, c' est ene politike des djins ki sont-st å pouvwer dins on metou payis (sovint on dictateur), po disfacer totes les sovnances des cis k' estént conte di zels et k' il ont dedja fwait disparexhe (assaziné).

C' est ene atuze k' a skepyî do trevéns des Romins. Ele s' î loméve e latén «Damnatio memoriae».

Egzimpe e l' viye Edjipe

sårcô ki pôreut esse li ci da Akenaton avou s' figueure ricatcheye

Li farawon Akenaton aveut vlou askepyî ene rilidjon avou on diè unike. Mins les priyesses nel shuvît nén, eyet, après s' moirt ses rsovnances on stî codånêyes. Si fi «Toutancaton» a minme sitî rbatijhî «Toutancamon».

Egzimpe dins l' Impire romin

L' an 211, l' impreur Septime Severe aveut lomé ses deus fis Caracalla et Gueta po-z esse impreurs tot les deus eshonne. Mins i n' s' etindént nén. Adon, Caracalla a touwé s' fré. Mins les cis k' estént po Gueta (metans dins l' årmêye) avént co sovnance di lu et s' alént motoit revinter conte di Caracalla. Adon, ci-ci distrujha totes les posteures di s' fré, martoker si vizaedje ezès graeveures, et fé touwer des meyes et des meyes di ses shuveus.

Egzimpe e l' Rûsseye d' asteure

L' afwaire Alexey Navalni mostere clairmint on codånaedje del sovnance pa Vladimir Poutine. Onk ki cåze di Navalni sins dire ki s' est on terorisse pout esse metou al prijhon. Avou ça ki Poutine ni dit måy si no divant les djins: i dit «cist ome la» u «on parey».

Houte di çoula, si on cwirt après des racsegnes sor lu sol Daegntoele on n' trouve rén (pask' elle ont stî cinsurêyes); et minme on sait esse porshuvou.

Sifwaite kidujhance politike e l' Beldjike