El Farabi

Pol discramiaedje des årtikes avou l' mot « Faradi et Faraday », loukîz cial.

Faradi u puvite El Farabi (arabe «الفارابي», alfârâbî), di s' plin no «أبو نصر محمد إبن محمد إبن طرخان إبن أوزالغ الفارابي, 'aboû naser mouHammad 'ibn mouHammad 'ibn Tarkhân 'ibn oûzâlarh alfârâbî», c' esteut on filozofe arabiscrijhant do 10inme sieke.

Il skepia diviè 872 a Wasij, on viyaedje a Nonne do Cazaxhistan d' asteure, mins k' esteut dins Grand Iran d' adon.

I mora a Damasse (Sireye) e 950.

Ouve

onk di ses lives, ki c' est on comintåre d' Aristote

Di s' djonne tins, i saveut l' trouk eyet l' piersan (si pa esteut on militaire di stok trouk, mins boutant po des tchîfs piersans).

Paraprès, il aprinda l' arabe, ki c' est divins ç' lingaedje la k' i va scrire tote si ouve.

Diviè 941, il ala studyî a Bagdet (Irak d' asteure): li grammaire, li lodjike, el filozofeye, les mates, li muzike et les syinces. Adonpwis, il dmora e l' Sireye (purade a Alepe), dins les coûs des zultans do payis. I voyaedja e l' Edjipe l' anêye divant d' mori.

C' est onk des scrijheus e-n arabe k' a transmetou les idêyes des filozofes greks å monde arabe (dabôrd ki leus lives avént stî disfindous d' lijhaedje e l' Impire romin coûtchantrece pa l' impreur Djustinyin e 529, paski loukîs come tcheriant del pinsêye payinne). Dandjreus k' il nd a bråmint aprins tot håbitant les crustins nestoryins, k' avént wårdé et rispårdou les tecses des filozofes greks dins l' impire bizantin.

Çou k' il a mo d' l' agrè po, c' est l' filozofeye politike da Platon, come esplikêye divins s' live «Li Republike».