Li nute s' a stindou (binde d' imådjes)

Tite (Rantoele-gazete l° 115, p. 20)

Et l' nute s' a stindou, c' est ene binde d' imådjes avou les bouyotes e walon askepieye totetirmint pa José Schoovaerts.

Elle a passé come fouyton dins l' Rantoele-gazete, des limeros 99 (2021) a 115 (2025), avou les bouyotes e rfondou trosseyes pa Lucyin Mahin.

Istwere do pordjet

L' idêye esteut di fé ene shûte al binde d' imådje «L' avesprêye», k' aveut ddja passé dins l' Rantoele-gazete, e noer et blanc (a pårti do limero 37). Cisse-ciale esteut dedja ene shûte di roman «So l' anuti» da Lorint Hendschel (scrît e 1995, eplaidî e 2006).

Li sinnario et les desséns da Djozé (José Schoovaerts) avént stî eplaidîs po « Rabulèts », ès gazete éndjolike ki parexha di 1999 a 2009.

Ciste ouve ci esteut ddja tote fwaite e moes d’ awousse 2006. Ele fourit prezintêye al bate d’ « ouves grafikes u odio » del Federåcion Waloneye-Brussele e 2008, avou des ôtes bindes d’ imådjes (çou ki fjha on live imprimé di 286 pådjes, saetchî a ene dijhinne d’ egzimplaires).

Les tecses des bouyotes estént scrîts e sistinme Feller.

Come dins «L' avesprêye», gn aveut des bouyotes avou ene contrumasse di rdijhaedjes di grands oteurs di belès-letes u d’ filozofeye, come Catule, Verlinne, Nitche, Vilon, Bådlaire, Teyåd d’ Tcherdin et Pascal.

Lucyin Mahin a rmetou les tecses des bouyotes e rfondou walon, et rarindjî les imådjes, l' an 2021. Sacwants tecses d' oteurs ont stî rsaetchîs, tot ndè wårdant k’ onk u l’ ôte, håre et hote. Mins les citåcions ont pacô stî rcopieyes ezès pådjes di ces djins la sol Wikipedia walon, tot rahoucant li mwaisse ratournaedje da Schoovaerts.

Li metaedje e coleur et li rcopiaedje des tecses des bouyotes e rfondou s' a fwait pitchote a midjote, tot shuvant les vudindjes del Rantoele-gazete, po tot fini e 2025.

• 
  Prumire plantche (brouyon)
• 
  Prumire plantche
• 
  Deujhinme plantche

Plaçaedje dins l' espåce et divins l' tins

«So l' anuti» finit l' an 1788, a Lene, k' est adon ezès Bas Payis otrichyins. Li mwaisse personaedje, Djustin Colot, k' a stî berôler avou l' årmêye otrichyinne, rivént e s' viyaedje et discovri k' il a on ptit-fi, Emile. E 1795, c' est l' abrocaedje des Francès e l' Walonreye-a-divni. Come si grand-pere, Emile Colot, divnou djonne ome, s' egadje e l' årmêye. Li cene da Napoleyon, ç' côp ci. Dins «L' avesprêye», i va viker l' batreye di Trafalgår di 1805, la k' les Francès ont yeu ene fele dispoûslêye. Mins Emile s' a bén batou. I dmeure cazerné a Cadisse la k' il est rwaitî come on hero.

Shûte ås raploûs d' Wîne, après l' batreye di Brinne-l'-Alou (1815), l' Emile si rtrouve Holandès. I n' a pus rén a fé a Cadisse. I doet rwangnî s’ novea payis, et s' ebarkêye po-z î raler.

Tote l' istwere si passe tins d' leu prumire hale e l' Iye corsike ciste anêye la.