Flora dal Hoûlote (teyåte)

Flora dal Hoûlote, c' est ene pîce di teyåte rimêye, sicrîte pa Gabrielle Bernard ey eplaideye e 1949.

C' est on drame.

Elle a stî reditêye (avou on tite pus diyalectolodjike, Flora da l'Oûlote), e 2020 (limero 13 del coleccion di belès-letes walones di l' SLLW).

Istwere di l' ouve

Elle a dvou esse sicrîte diviè 1936.

Li pîce a wangnî l' pris do Govienmint di tos les troes ans po 1946.

Elle a stî djouwé kékes côps e teyåte, pu a divnou on tévéfime, tourné a Dinant pu a Bonene pa André Gevrey.

Djouwaedjes

Elle a stî creyeye li 10 di måss 1949 pal Dramatike do Rweyå Teyåte di Nameur, e leu såle di Nameur. Pu rdjouwêye li 18 d' avri å minme teyåte di Nameur, pu l' 21 d' avri a Moustî.

Ridjouwêye a Anverse li 16 di djanvî 1951, pu a Lidje li 23 d' decimbe del minme anêye.

Eco on côp a Nameur avou l' dramatike Aimé Courtois, li 19 di fevrî 1978, la ki l' mwaisse role da Flora esteut djouwé pa Jany Paquay et l' ci da Gaspård pa Jules Goffaux.

Plaeçaedje dins l' espåce et dins l' tins

On sint k' c' est on payis des boirds di Sambe, avou ene ritche plinne ås grossès plantiveusès cinses, et des tienes la k' les pus ptites djins ont basti. Adon, li payis d' Moustî. Come Celine vént a cariole trover Flora, on pout rmete li sinne dins l' Eter-deus-guere. Après l' guere di 40, les gros cinsîs si vont payî des otos.

Rascourti

Gaspård, on gros cinsî do Trî Mareye, et Djuråd, li mônî vijhén, k' est parint avou lu et k' leus teres si djondnut, fijhèt martchî po maryî leus efants. Celine, li feye do molén, k' a ddja cwefé troes côps sinte Catrene (28 ans), et Djulén 24 ans, ki n' a måy hanté, mins ki trove drole k' on l' voye fé spozer si cuzene, ki lyi shonne si grande sour. Mins come c' est èn efant ki shoûte si pere... Dji n' a nén di « ki schoûte ses parints », paski l' cinsî Gaspård est ddja vef dispu ene tchoke. Et c' est on djan-comere, tantea ki l' mônî a ene miete peu po s' feye, avou ç' laid godi la k' on a spoté li Mårivnant.

Mins i lugne dispu kéke tins so ene djonnete do voyaedje, ki s' mere est rbouteuse. Adon, on l' dit eto macrale, et on l' a spoté l' Hoûlote. I lyi vôreut ofri ene bele bistoke por leye si houtdiner.

Mins arive ki, li djoû ki les deus peres bouxhèt l' martchî djus, Djulén rescontere Flora ki vént d' aler code des yebes ås maladeyes. I dviznut ene miete et ele lyi waite les lenes di s' mwin, divant di steper evoye.

Ça sint l' agnon, tot çoula, edon, vos ?