Walon : deujhinme boket do responda da Raymond Evrard moenné pa Claude Snaps so li skepiaedje del dramatike di Tourene "Les Longuès Penes" (resconte adjinçnêye pa Jacques Desmet; filmaedje et produjhaedje: Lucien Mahin.

Tecse

Raimond Evrard (R.E.). - Dji continowe ene miete l’ evolucion des Longuès Penes.

Dimandeu (Claude Snaps) (Dm.). - Ebén continouwez ene miete a-z espliker comint çki ça a tourné.

R.E. - Dji pinse k’ on djheut... C’ esteut l’ Gui da Canva ki meteut e l’ sinne. Sacwants anêyes après ‒ si dji m’ sovén bén, c’ esteut e 1985 ‒ les Longuès Penes m’ ont dmandé po djouwer avou zels. Et dispoy adon, bén, dji djowe avou zels. Målureuzmint, cwand l’ Gui da Canva a morou foirt djonne,…

Dm. - …bråmint trop timpe !

R.E. - … c’ est l’ André d’ Albertin k’ a comincî a esse li mwaisse del trope. Il a fwait ça sacwants anêyes. Et adon, bén, i n’ s’ a pus sintou foirt bén. Ebén, on a aresté do djouwer. Å moens pindant shijh set ans ; å moens !

Dm. - Ossu lontins k’ ça ?

R.E. - Seulmint, on aveut må s’ cour, cwand on veyeut ene ôte trope ‒ paski des côps, i fjhént vni li trope di Cirou-Moustî, ki djouwéve… ki vneut… Et tchaeke côp, dj’ aléve vey, et dj’ aveu todi må m’ cour e djhant : « Waite, c’ est tolminme teribe di vey ene ôte trope walone djouwer so nosse sinne. Ça fwait… adon on djoû… l’ André Vanhemelen vineut sovint ricweri li ptit a scole. Et tchaeke côp, i mi djheut : « A ! Raimond ! Cwand est çk’ on rcomince, cwand est çk’ on rcomince !?

Mins mi, a ç’ moumint la, dji n’ saveu pus. Dj’ esteu directeur a ç’ moumint la. Dji n’ aveu nén l’ tins. Mins adon, on côp k’ dj’ a stî pinsioné, André a rivnou avou ça et m’ dit « et cwè, Raimond !? Ti freus bén di mete ça so pî, et di mete e l’ sinne, di esse li… » « Abén mi, dj’ inme bén do djouwer. » « O ! bén ti frès bén les deus ! » dit-st i. Dji di : « Bon ! Dji m’ va sayî. » Ey insi, dispoy adon…

Dm. - Et i gn a cobén d’ anêyes ki ça toûne insi ?

R.E. - Dispoy deus meye onze. C’ est l’ dijhinme pîce ki dj’ va mete e l’ sinne.

Dm. - Et dj’ a bon d’ el dire : tchaeke côp ki vos djouwez, c’ est rimpli come èn oû.

R.E. - C’ est rimpli come èn oû.

Dm. - Et i n a bråmint des djonnes. Dins les djouweus, i n a des djonnes.

R.E. - I n a bråmint des djonnes. On a des djonnes ki djouwnut. Et i n a bråmint des djonnes ki vegnnut. Et ‒ come dj’ esteu e scole, dji les conoxhe, ça fwait ! Et li prumire anêye k’ il estént la, après, dji di « Vos n’ avoz bén seur rén comprins » Après, i m’ ont dit k’ siya. « On n’ comprind nén mot a mot » k’ i m’ ont dit, « mais dans l’ensemble, on a quand même compris ». Et tchaeke anêye, i rivnèt. Ene vintinne, hin ; tchaeke anêye i rivnèt a ene vintinne, et vola ! Et adon, et c’ est come ça k’ on a todi sayî di progresser.

Dm. - Et vos avoz minme sitî djouwer a Lidje !

R.E. - Vola, don, on fwait pårteye… On s’ a inscrît al Federåcion walone do Braibant et d’ Brussele. Et c’ est insi ossu ki tchaeke anêye, totes les tropes ki sont-st afiyeyes a ç’ federåcion la, on si rtrouve a Perwé po djouwer totes les pîces k’ on a dné.

Dm. - Avou Bodson.

R.E. - Avou Djôzef Bodson, åy !