Joseph Houziaux

Joseph Houziaux, c' esteut on scrijheu e walon di Cele.

Il a skepyî li 13 di måss 1901 ey a morou li 22 d' awousse 1969.

Di s' mestî, il a stî prof d' umanités, pu inspecteur des scoles sigondaires.

A costé di s' mestî et do walon, il esteut eto compôzeu d' muzike d' eglijhe.^[1]

Joseph Houziaux, c' est l' pa da Mutien-Omer Houziaux.

Ouves

Si tchîf-d'-ouve, c' est seur li live di sovnances : Li vicåreye d' on gamén d' Cele (Li Vicaîrîye d'on gamin d' Cêles) (1964) replaidî e 2003.

Mins on lyi doet eto :

E payis d' Cele (O Payis d' Cêles, 1948)
On dmey cint d' fåves di Lafontinne (on dméy-cint d' fauves da La Fontin.ne, 1949)
On cwåtron di novelès fåves (on quautron di novèlès fauves, 1954)
Letes des viyès pires (Lètes dès Viyès Pîres 1962-1968).

Å totå, il årè scrît 182 fåves, letes, powinmes et tchansons e walon.^[2]

Li Wiccionaire si rsieve di sacwantès fråzes da Joseph Houziaux po-z enimådjî des mots k' i gn a.
Vos trouvroz des racsegnes so les ouves da Joseph Houziaux, u les ouves zeles-minmes, sol Wikisourd e walon.