L' ouxh å lådje (roman)

Èn årtike di Wikipedia.
coviete do live

L' ouxh å lådje (l' uch au laudje), c' est on roman da Chantal Denis k' a vudî e 2003, dins l' coleccion Somme Denis di romans e walon.

Tinmes[candjî | candjî l’ côde wiki]

Li tinme, c' est les manaedjes d' ouy, avou les deus ki boutèt, ki n' si voeynut nén tins del djournêye, et k' ont des ocåzions tant k' i vlèt, di fé on schård e sacramint.

Plaçaedje dins l' tins et dins li spåce[candjî | candjî l’ côde wiki]

Les persounaedjes voyaedjèt emey li campagne namurwesse (Cînè, Djiblou), mins pacô ene miete pus lon (Barake Fraiteure). L' ome boute dins l' administråcion, a Brussele. Li feme est gaztrece. L' ôte cope, l' ome est directeur d' ene société, et i bodje bråmint minme a l' etrindjir (Aldjereye, Marok. Al fén, Djuleye eva e l' Inde. C' est ene paskeye do 21inme sieke, ca les persounaedjes ont ddja des axhlåves (GSM) et s' endè siervnut po bouter (minme cwand i s' pormonnèt dins les tchamps).

Racourti[candjî | candjî l’ côde wiki]

Li spoûle kimince on bea djoû al shijhe, la ki Tchåle (Châle) et Evlene fiestixhnut leus 10 ans d' mariaedje. Sins dmander, la Djhan Delpire, on vî socon di scole, ki s' fwait priyî a l' eurêye. Djhan, c' est on… Djhan-comere, ki n' sondje k' a s' fé valeur et fé do ronflant. Evlene li trouve bén plaijhant. I s' ritrouvnut (avou Tchåle ki n' voet la noû må) ezès restorants, sol pisse di danse, u a djouwer å tenisse. Tchåle Mouzon, c' est on ptit grete-papîs, bouteu timpesse, ome sins brut. I n' bodje nén d' Inguezêye. I s' etindnut bén, lu et Evlene, sins tapaedje. Mins, a fwait kel bea Djan, come ene venêye mousrece, si stitche dins s' manaedje, nosse Tchåle atrape des dotances. Mins sins l' oizeur dire a nolu, nén ddja a Djuleye, li dierinne crapåde då Djhan. Ene nozêye glawene, nén co ttafwaitmint rsouwêye padrî les orayes, et ki vôreut kécfeye bén aveur ene rilåcion avou èn ome pus vî k' leye. Mins Tchåle, lu, ni vôreut nén tromper Evlene, målureus, vozôtes !