Les Nouvès Bressenes

Cisse pådje ci est scrite e walon mins nén e rfondou, vos nos ploz aidî, clitchîz sol loyén « candjî l' pådje » po li riscrire e rfondou.

Les Noûvès Brèssènes, c' est on cwårtî istorike di Votem, ene seccion del comene di Hesta, el province di Lidje, el Beldjike.

Li plaece, k' on loméve divins l' tins èl basse des bressenes , si trouve dins l’ schavêye del Vizé-Vôye, al limotche inte Votem et Rôcou^[1].

Toponimeye

Li no Nouvès Bressenes provént di çou k' i gn aveut vaila tot plin des fabrikes ki fjhént del bire, dedja tins del Moyinådje.

On trouve ci no d' plaece la dins sacwants ancyins documints :

Wilkin des Noeuves Bressines (1347, Gobert, II, 258)
extra portam Ste Walburgis Leodiensis inter crucem illic erectam et Brassinam novam (1367, ibid.)
terre desseur le chaine alle Vôye d’Ans dessous les neuves bressines (1402, Beaurepart VIII, 31)
un bonier de terre auprès des Neuff Brassines hors Liège, en terroir de Votem (1426, Gobert II, 259)
terre en lieu condist paseal d’Ans entre Votem et les nouves bressines (1455, Beaurepart IX, 60)
et co dins des ôtes vîs papîs djusk' å XVIII^e sieke (Vaucher, 1812)

Istwere

Dedja tins del Moyinådje, li plaece lomêye les Nouvès Bressenes a stî on cinte di bressaedje.

I gn aveut cial sacwantes bressenes, totes sitouwêyes å long del Vizé-Vôye, on åxe ki raloyî Vizé a Djimepe-so-Mouze sins passer pa l’ veye di Lidje.

Cisse voye, pus direke et pus sëre, fjheut k' les tcherieus n' avént nén a sopoirter les mås costés del grande veye — avou ses stroetès voyes, ses cåbarets, et tos les tins ki fiestixhént pa rd avou les voyaedjeus.

Li site s’ trouve ossu ås cwate brès avou l’ ôte impôrtante voye å nôr di Lidje, l’ Viye Voye di Tongue.

C' est la k’ les bressenes s’ ont vnou astapler, fôrmant on vî croejhlåde di comiece å nôr di Lidje.

Li mestî des bresseus lidjwès aveut des biens fonciers sol terra di Votem.

E 1331, c' est « en Brassine, deleis l’ pôrte di Sint-Wabeur » ki s’ tint on grand raploû des scabéns di Lidje, k' ont djudjî Pîre Andricas et ses complices.

Li hamea des Nouvès Bressenes a stî ossu l’ plaece d’ evenmints militaires rimarcåves :

E 1468, å moumint do sidje di Lidje, Louwis XI et Tchåle Franc Tigneus ont levé leu camp dins l’ plaece divant l’ dierin assôt.
Li plaece a stî broûlêye cisse anêye la, et pus tård, e 1479, tins des toursixhaedjes etur les familes del Måtch et des Hornes (Gobert 258).

Sitouwåcion djeyografike

Ouy, li cwårtî des Nouvès Bressenes corespond å rante del Visè-Vôye et del Verte-Vôye, å sud-ouèsse di Votem, près di l’ échandjeu d’ ôtrote (E40/E313).

Li pårteye sud do cwårtî a stî transferêye di Votem viè Lidje e 1975, po-z on pordjet d’ agrandixhmint del cimintire di Sinte-Walburge (ki n’ a pon stî fé).

Ça conserne l’ rowe des Tindeus et l’ rowe des Neûfs Djournås, ki fwaiynut asteure onk a mwa ene ptite exclave del veye.

Minme si l’ payis a stî foirt candjî avou l’ urbanijhaedje et les grandès voyes, li no dmeure dins l’ memwere des djins et so sacwants mapes.

I r’mande l’ rôle istwerike do carrefour eter l’ valaye del Mouze et l’ platea d’ Hesbaye, insi ki l’ prezince d’ ovraedjes artisanås et brèssès k’ n’ egzistèt pus.

Houye, ås cwate tchimins, i gn a on grand botike Aldi å costé d’ on centre fermê po les etrindjîs en sejourn nén régulî et d’ on caserne del Police fédéråle.

Patrimoenne et memwere locåle

Li no Nouvès Bressenes a tot l’ coût ene valixhance toponimike et patrimoennåle. I rapexhe å côp :

les vîs bressenes do Moyinådje
l’ structeure des Vôyes å Votem (Visè-Vôye, Verte-Vôye)
et les evenmints istorikes aloyîs al guere di 1468 et ås trublès di l’ XV^e sieke

Li cwårtî dimeure on pont d’ repere dins l’ payis votemwès, et fwait pårteye des plaece-dîts ki sont co mintenous e memwere et dins les årtchives locåles.

Li rowe des Nouvès Bressenes, a Lidje, n’ indike nén l’ plaece minme des Nouvès Bressenes, mins stîve å l’ epoke on ptit såvète ki raloyî les cwårtîs d’ ouèsse del veye ås bressenes.

Referinces

Gobert, Cartulaire de la Cité de Liège, t. II, 258-259
Beaurepart, Documents pour l’histoire du pays de Liège, t. VIII-IX
O.V., Årtchives do Chapitre Sint-Lambert, divèrs volumes (1530-1699)
Vaucher, Inventaire des propriétés liégeoises, 1812

Vey ossu

Sourdants

↑ Renard, E. (1934). Toponymie de Vottem et de Rocour-lez-Liège, Mémoires de la Commission royale de Toponymie et de Dialectologie.

[1] Renard, E. (1934). Toponymie de Vottem et de Rocour-lez-Liège, Mémoires de la Commission royale de Toponymie et de Dialectologie.

[1]