Motî:Bon Diu

Èn årtike di Wikipedia.
Sauter à la navigation Sauter à la recherche

Wiktionary-logo.svg

Li mot "Bon Diu" est recråxhî sol Wiccionaire

Bon Diu [no prôpe]

1. po les crustins, les djwifs, les muzulmans, sakî k' est ådzeu d' tot, k' a askepyî totafwait, et ki decide di tot çou ki s' passe el daegn ey e cir. rl a: bondiu, Diè; rl a: Ala, Grand Mwaisse, Grand Askepieu. >> Ki l' Bon Diu vs etinde; u: ki l' Bon Diu l' voye: dijhêye po sohaitî a ene sakî çou k' i vout, mins sins î croere ditrop. >> Ki l' Bon Diu nos è waerantixhe !: dijhêye po dmander å Bon Diu di nos houwer foû d' on måleur. F. Dieu nous en préserve. >> ki l' Bon Diu vos benixhe: a) dijhêye po rmerciyî. b) dijhêye cwand ene sakî stierni; li response po rire est: et ki l' diåle t' apice. >> ki l' Bon Diu vos l' rinde: dijhêye po rmerciyî. >> ki l' Bon Diu vs codujhe !: dijhêye po sohaitî bon voyaedje. >> ki l' Bon Diu t' kidujhe, les deûs djambes å hôt, ti n' piedrès nén tes tchåsses: xhinaedje del minme dijhêye. >> a l' wåde do Bon Diu !; u: a l' volté do Bon Diu !: dijhêye cwand on va cmincî ene sacwè d' riské. F. à la grâce de Dieu. >> Li Bon Diu si åme; u Li Bon Diu l' mete e s' paradis; u Li Bon Diu l' mete dins s' potche: dijhêye po cwand k' on cåze d' on moirt, d' ene moite. >> lomer l' Bon Diu "Cadet"; u: djurer l' no do Bon Diu: cåzer do Bon Diu sins respet. F. blasphémer. >> ossu seur k' i gn a k' on Bon Diu (e cir): seur et certin. F. absolument certain. >> Bon Diu d' pitié: lomaedje do Bon Diu cwand on lyi dmande pitié dins ses måleurs. Priyire å Bon Diu d' Pitié (F. Dewandelaer) >> Il est tiré come on vraiy Bon Diu d' pitié: Il edure ses rascråwes. >> K' avans ns fwait å Bon Diu, don ?: dijhêye cwand on-z a ene chîlêye di måleurs. >> Fåreut ki l' Bon Diu freut s' miråke: on-z åreut dandjî d' on miråke po schaper. >> Bon Diu !; u: binamé Bon Diu !: siclameure cwand on-z est sbaré u k' on-z est seré. rl a: mon Diu !. F. Dieu du ciel ! >> Cwand on s' poite bén, on n' sondje nén å Bon Diu: on nel preye ki cwand ça va må. >> li Bon Diu n' paye måy avou des cwårs: cwand on fwait ene boune accion, c' est nén po esse payî. >> Gn a on Bon Diu po les sôlêyes, po ls efants, po les sots: les sôlêyes, les efants, les sots n' ont waire d' accidint, mågré k' fijhèt åk di riskeus. >> do tins do vî Bon Diu: a) (rilidjon catolike) dins l' ancyin Testamint. b) do vî vî tins (avou l' idêye ki çou ki s' fijheut adon est foû môde). rl a: Hinri. F. autrefois. >> Li Bon Diu djouwe ås beyes u: ås gueyes; u: c' est l' Bon Diu ki scrote ses pîs: dijhêye po cwand k' i tone. >> Li Bon Diu n' î a måy passé: dijhêye po cåzer d' on mwais tchmwin. F. route dégueulasse, impraticable. >> Onk (ene) k' a skepyî on djoû ki l' Bon Diu les prindeut tertos: onk (ene) ki n' est nén come èn (ene) ôte. rl a: dimey-doûs. F. simple d'esprit. >> il est waitî come li Bon Diu; u: i nd avént fwait leu Bon Diu: on croet tot çou k' i dit, on voet voltî tot çou k' i fwait, on lyi dene tot çk' i dmande. F. adulé, bien considéré. >> ç' a stî on Bon Diu por mi: i m' a foirt aidî. F. providence, bon secours. >> Li gregne do Bon Diu est todi å lådje: Li Bon Diu est todi presse a nos rçure et nos schoûter. >> Li Bon Diu pûnixh les djins, i n' dit nén pocwè: sipot po fé accepter les måleurs, come on pûnixhmint do Bon Diu, minme a onk ki n' a rén a si rprotchî. >> li Bon Diu a des longuès vedjes; u: des grandes vedjes: dijhêye po onk k' a fwait ene sacwè d' må, et ki croet k' i serè nén pûni. >> Li Bon Diu n' avoye måy li fa sins l' sorfa°. >> tini l' Bon Diu pås pîs: viker binawreuzmint. F. comblé. >> On n' direut k' i tént l' Bon Diu pa l' djambe: i fwait di s' nez. >> I raetchreut dins l' vizaedje å Bon Diu: il est presse a tot, c' est on bon-a-tot. F. être immoral. >> Bon Diu d' rowes, Diåle di måjhone: onk, ene k' est binamé(êye) divant les djins, et haeyåve e s' måjhone. >> diveur å Bon Diu et ås sints: diveur des cwårs a tertos. rl a: Tîxhons. >> C' est l' Bon Diu k' el vout, les sints n' è plèt rén: gn a pont d' avance di priyî les sints dins l' måleur. >> i våt mia s' adressî å Bon Diu k' a ses sints; u: våt mia priyî l' Bon Diu k' les sints: våt mî aler trover li mwaisse ki si vårlet. >> li Bon Diu rabat l' roye; u: cwand on råye, li Bon Diu disråye; u: treråye: dijhêye po les cis ki vont conte les lwès del nateure. >> On voleu k' è vole èn ôte, li Bon Diu ndè reye: dijhêye po balter on hapeu k' on lyi rhape. >> Deus pôves ki s' coplèt, ça fwait rire li Bon Diu: dijhêye cwand des ptitès djins s' aidèt. >> i n' fåt nén ctaper l' pwin do Bon Diu: dijhêye po fé respecter l' amagnî. >> li loyeure; u: voye do Bon Diu: airdiè. >> magneu° u mindjeu d' Bon Diu. >> mete sint Pire° so l' Bon Diu. >> esse dins l' cou° do Bon Diu. >> t' es trop malén° po l' Bon Diu, li diåle t' årè. >> asteure, priyîz l' Bon Diu k' i djale° !

2. po les crustins, Djezus-Cri. Påke, c' est l' djoû ki l' Bon Diu a raviké. C' esteut l' Bon Diu ki rotéve so l' aiwe. rl a: bondiu.

3. po les crustins, li coir et l' sonk di Djezus-Cri, dins l' matire do pwin (dinltins l' osteye) et do vén, copurade cwand on les apoite ås malådes po comunyî. >> aler poirter l' Bon Diu: aler dner l' comunion a on malåde e s' måjhone. Il est bén bas, li curé lyi a stî poirter l' Bon Diu. A nén confonde avou l'sacramint des malådes (k'on loméve estrinme onccion). F. viatique. >> On lyi dinreut l' Bon Diu sins cfession: il (elle) a l' air oniesse, mins c' est on (ene) toursiveus(e). F. hypocrite.

Disfondowes: Bon Diu, Bon Dju, Bon Diè, Bon Diew, Bon Djë, Bon Dië, Bon Djeu.


Parintêye: