Motî:scheure

Èn årtike di Wikipedia.
Sauter à la navigation Sauter à la recherche

Wiktionary-logo.svg

Li mot "scheure" est recråxhî sol Wiccionaire

scheure / escheure (codjowaedje)

I. [v.c.]

1. hossî foirt ene sacwè po fé toumer çou k' i gn a dso. Alez scheure li loke ås poussires. Ele scheut les carpetes divant l' ouxh. Ele scheut li mape foû pal finiesse. Les ptits valets schoyént les åbes po fé toumer les åbalowes (H. Forir). Wice pôrè dju scheure èm pupe ? Cwand on-z aveut batou al mwin, on schoyeut li strin po fé toumer les mannestés. On-z aléve scheure li bouwêye å bî, pol bén rispåmer ([[ramexhné pa M. Francard]]). F. secouer. >> scheure li speate ( u: li blé): li hossî po n' wårder k' el xho (et aveur les payetes foû). F. vanner. >> scheure li feu: a) grawyî dins l' feu po fé toumer les cenes, et k' i våye mî. Schoyoz l' feu, Zabele, Pu vnoz dins mes djnos; Po nos tni tchôd cwand i djale, Recoulotans nos (J. Bertrand). F. tisonner. b) waitî d' ahoter on feu dins les bwès. Les pompîs ont stî scheure li feu avou des Canadairs. F. maîtriser un incendie. >> i nd eva la come s' il ireut scheure li feu: come li vint d' bijhe. F. en toute hâte.

2. (pus stroetmint) hossî des åbes a frut po k' les fruts toumexhe. E schoyant l' pronnî, i s' a fwait må. E l' schoyant d' aleure, vos åroz les dierins puns d' vosse pemî (F. Deprêtre et N. Nopère). F. secouer. >> Schoyans l' biyokî tant k' i gn a des biyokes: (cwårdjeu) dijhêye cwand on djouwe atote, et k' les trionfes des ôtes schoyèt.

3.toumer (des fruts tot hossant l' åbe). scheure les pemes, les puns (les pronnes, les biyokes), les poeres, evnd. Il a tchai e schoyant ses poeres. I schoynut les olives avou on ptit tracteur ki cahosse l' åbe. F. récolter. >> scheure ås biyokes, ås pemes, ås olives, evnd: aler al schoyåjhe des biyokes, des pemes, des olives. F. faire la récolte.

4. fé toumer (ene mannete sacwè aplakêye après ôte tchoi). scheure l' ivier djus des åbes, djus do toet. I lyi a schoyou l' nivaye djus di s' mantea (H. Forir). Li four trop setch scheut les sumeçons (ramexhné pa M. Francard). T' as schoyou l' årzeye djus d' tes smeles (L. Warnant). >> scheure les poûssires: sipoûsler, dispoûsler, schovter. F. épousseter. >> scheure ses pouces: si raletchî, tot djåzant d' on tchet. F. se bichonner. >> va-z è scheure tes pouces !: dijhêye po-z evoyî ene sakî å diåle, u po k' il overe, s' il est nawe. >> on l' scheureut foû d' ses clicotes: il est foirt amwinri. F. maigri, émacié.

5. (imådjreçmint) fé piede (ene laide manire). Dji lyi scheurè ces laidès manires foû do coir. F. corriger, débarrasser. >> L' oûsse piede ses poyaedjes mins i n' scheut nén ses laidès manires: ci n' est nén tot divnant vî k' on coridje ses dfåts. Franwal: ahåyant po: "Le vieux loup se fait ermite".

6.berlondjî, hossî comifåt. L' åbe est scheu på vint. On schoyeut l' bidon d' tamblete po-z aveur bråmint del schoume (P. Defagne). Li mårlî scheut les clokes et les fé triboler (E. Gilliard). On dit eto: waxhoter, kihossî, hårloxhî, hårlicoter. F. secouer, agiter. >> scheure si tiesse: hossî s' tiesse po mostrer on sintimint (dire k' oyi, ki nonna, evnd). F. hocher la tête. >> endè scheure les mwins: dire k' on s' rissaetche di tote responsåvisté. Dji n' m' endè mele pus, dj' endè scheu les mwins (J. Wisimus). F. s'en laver les mains. >> i n' a k' ses oreyes ( u: k' ses penas) a scheure: i n' a nole rujhe po viker. F. sans souci.

7. prinde ene sakî på bresse et l' hossî, pol rewoeyî, pol rimostrer, po lyi fote ene dobleure. Dji l' a schoyou come on pronnî. Schoyoz on pô mi ome, drola, po k' i travaye (J. Coppens). E schoyant l' gamén po k' i schoûte, dji m' a fwait må (F. Deprêtre et N. Nopère). Il a yeu on laid bultén: i s' va co fé scheure (P. Defagne). Il innmrént vni scheure les Prûssyins k' els ont-st oblidjî a fé l' guere (E. Wartique & E. Thirionet). On dit eto: kischeure. F. secouer.

II. [v.s.c.]

1. toumer a cåze d' on hossaedje, d' on shofla d' vint, evnd. Li vint a fwait scheure les pomes djus des melêyes. Les biyokes schoyèt a make. Les noejhetes schoyèt cwand ele sont schayetes (J. Wisimus). Les foyes kimincèt a scheure. C' est ene pådje k' a schoyou foû d' on live. On dit eto: tchaire. F. tomber. >> scheure foû d' ses clicotes: esse foirt maigue. F. maigre. >> si leyî scheure foû pal finiesse: potchî pal finiesse. Il aveut l' feu e manaedje, et i s' leya scheure foû pal finiesse. F. sauter.

2. (cwårdjeu) toumer tot djåzant des triyonfes. Alez, fijhans scheure leus triyonfes ! F. tomber.

3. ariver todi al minme date, tot djåzant d' on paymint. Dj' a ene rinte d' 500 euros ki scheut tos les moes. Vosse moes scheut l' cwénze. Li date est schoyowe. On biyet ki scheut l' trinte do moes (H. Forir). F. échoir.

4. ariver (tot djåzant d' èn etrevén). Li djoû del moirt scheut po tolmonde (J. Wisimus). F. arriver, advenir. >> leyî scheure: leyî passer l' tins et k' on n' pout pus ataker. F. attendre qu'il y ait prescription.

5. leyî toumer del plouve, tot djåzant des åbes, des nouwêyes. Il a ploû bråmint, les åbes schoyèt. I schoyèt a grossès gotes. Les fyis schoyèt cwand i li djivronde rilene (ramexhné pa M. Francard). Li vegne scheut: metoz åk so vosse tiesse (H. Forir). Bénrade, les nouwaedjes scheuront (L. Warnant). F. s'égoutter.

6. leyî toumer des ptitès sacwès. Li four scheut; less mayes toumèt foû (ramexhné pa L. Remacle). F. s'égrener.

7. piede des kilos. Il est bråmint schoyou dispoy k' il a stî malåde. Elle a brâmint schoyou d' ces tins ci. Elle est crånmint schoyowe dispu s' mariaedje. On dit eto: ramwinri, freyî. F. fondre, maigrir.

8. distinde (piede ses coleurs, tot cåzant d' ene sitofe). Li sitofe di vosse robe ni scheurè-t ele nén å solea. Li tchmijhete n' a nén schoyou al bouwêye (H. Forir). Vosse coton scheurè. Li noer do drapea a schoyou sol djaene (J. Wisimus). F. déteindre.

9. aviyi foirt, aviyi divant l' ådje. La ene djin ki scheut djolimint. On dit eto: baxhî. F. vieillir, décliner.

III. si scheure [v.pr.]

1. fé hossî mwints côps les tchås did dizo l' pea, tot djåzant d' on tchén, d' on tchvå. Les tchéns s' schoyèt cwand i sont frexhs. Les tchvås s' schoyèt po s' moxhyî (H. Forir). Les tchvås ki s' schoyèt sont haitis (ramexhné pa L. Remacle). F. se secouer, s'ébrouer. On dit eto: si cscheure.

2. fé toumer l' aiwe do plouve k' on-z a so ses cayets. On s' scheut cwand on-z est crou. On dit eto: si sgoter. F. s'égoutter, se sècher.

3. si dispierter po ovrer pus foirt. I fårè waitî d' vos scheure ene miete, la, monparan. F. se secouer, se réveiller, réagir.

4. si revinter. Il åreut falou l' vey si scheure cwand on l' a rmostré. On dit eto: si rdeuler, si rediver. F. se rebeller, protester, s'insurger.

5. si ctaper. F. se démener. >> si scheure come on diåle dins on benitî: si måvler. F. s'énerver, se démener comme un beau diable.

IV. [v. sins djin] toumer. Il a schoyou ene potêye djus del finiesse. Schoyeut i del plouve del nivaye, T' esteus-st a houte el tchôde coulêye (L. Warnant). On dit eto: tchaire. F. tomber. >> è scheure: toumer bråmint del plouve. I nd a schoyou, la, dispu ersè. F. pleuvoir à verse. On dit eto: vudî, rilayî, chlôner. >> scheure a l' aiwe: aveur des gotires. I scheut a l' aiwe avå l' beur, i gn a ene crepe råyeye (ramexhné pa J. Haust). F. pleuvoir.

Etimolodjeye: latén "excutere" (minme sinse).

| eschoyant [addj., padrî dins l' ratourneure] a bresses eschoyants: ki schoyèt, ki toumèt tot berlondjant, tot djåzant des bresses. I ndaléve les bresses eschoyants.. Ele rote a bresses eschoyants. F. ballant.


Parintêye: