Motî:shofler

Èn årtike di Wikipedia.
(Redjiblé di Motî:shoflé)
Sauter à la navigation Sauter à la recherche

Wiktionary-logo.svg

Li mot "shofler" est recråxhî sol Wiccionaire

shofler (codjowaedje)

I. [v.s.c.]

1. fé rexhe di l' air avou foice di ses peumons, pa s' boke. Shofele so t' sope po l' rafroedi ! Shofler so les cindes po fé resprinde li feu. Li blanke feme drova l' capot et s' si mete a shofler londjinniveuzmint sol moteur. Fffuuu ! Fffuuu ! (L. Mahin). >> shofele dins tes mwins ! u shofele dins tes doets: dijhêye a ene sakî po k' il apougne on målåjhey ovraedje.

2. el fé passer dins èn instrumint d' muzike. Li martchand d' crinme-glaeces aveut bea shofler: les peres n' estént nén di dnêye ci djoû» la. (A. Goethals).

3. bodjî raddimint, tot cåzant d' l' air, d' on gåz. Li bijhe shofele a grands côps. L' air shofele dizo l' ouxh. Tote li nute, il a djalé a pire finde et l' bijhe ki shofele schove divant leye ene nive fene come del poussire di gregne et brocleuse come do blanc såvlon (P. Moureau). >> L' air shofele al Bijhe u: el vint shofele di Bijhe: i bijhe, l' air vént do Nôr. >> I fåt rwaitî do ké costé k' l' air shofele: i fåt vey comint k' les cayets vont tourner, kî çki va esse li pus foirt, et s' aprester po. >> L' ivier a shoflé: i gn a des consires. >> Li trô d' sonde shofele: (mot d' houyeu) gn a ene rexhowe di grijou på trô d' sondaedje.

4. a) respirer >> Il a rovyî d' shofler: il est moirt. b) respirer målåjheymint. >> shofler court u shofler come on boû» u shofler des poes: respirer avou des grands movmint des coisses. rl a: tanfler, haner, si dshofler. F. haleter. c) awè målåjhey po fé ene sacwè. El tchivå shofele po monter l' tiene. rl a: teguer. F. peiner.

5. si rpoizer on moumint, riprinde alinne. Dj' alans shofler on pôk (ramexhné pa M. Francard). rl a: rishofler.

6. dire ene sacwè. Si t' shofele, t' årès t' gueuye petêye ! >> èn oizou shofler: èn oizou moti. Si neveu n' oizreut shofler dvant lu (H. Forir). >> shofler des pouces a l' oraye: conter bebele a ene comere po l' amidjôler. F. conter fleurette.

II. [v.c.]

1. fé bodjî ene sacwè avou d' l' air (shofler dsu). Shofele ti sope ! Ele mi shofléve li foumire å nez. Li peupe Djatravåtide, ki vike sol planete Viltvodel VI, croet ki l' Univiers tot etir a stî shoflé foû» del narene d' ene Sakî k' i lomèt "li Grand Vete Atacalnåse" (D. Adams, rat. pa L. Hendschel). >> shofler li tchôd et l' froed: fé acroere on côp k' on-z est binåjhe, et ene munute après k' on-z est mwais.

2. fé ndaler ene loumire, tot shoflant dsu. shofler ene boujeye, ene aloumete, li kinket. Il ont shoflé l' wåmele: i n' les fåt nén disrindjî. F. éteindre.

3. (pa stindaedje) clôre ene lampe u èn aparey electrike. Shofloz les lampes, vos loumoz l' djoû». Shofloz l' copiutrece divant d' aler marinder. F. éteindre. Ingl. to switch off.

4. shofler s' nez: shofler pal narene, tot l' resserant, po fé rexhe li nåse foû» do nez. F. se moucher. Ro. a-şi sufla nasul. >> shofloz vosse nez, vosse vizaedje ès gonfele ! u: shofloz vosse nez, vos voeroz pus clair ! u shofele ti nez paski t' as t' tiesse k' infele: dijhêye po fé comprinde a ene sakî k' il est trop djonne po-z etervini dins ene bate di dvize. Franwal: ahåyant po: la ferme, morveux.

5. rimpli avou d' l' air, gonfler. shofler ene vexheye. >> shofler les rinnes: djeu d' efant did dinltins, ki meténs on fistou di strin o drî des guernoyes, eyet les gonfler. >> shofler on moton: shofler d' l' air dizo l' pea d' on moton touwé, po-z awè pus åjhey a li schoircî. >> shofler les tripes: rimpli les tripes d' air, divant d' fé les boudins, po vey s' ele ni sont nén trawêyes. >> shofler l' veule: el travayî a tchôd etot shoflant.

6. haper. I s' a fwait shofler s' djin (ramexhné pa M. Francard). Ele s' a leyî shofler s' galant. F. chiper, subtiliser. >> shofler l' plaece a ene sakî: esse nomé en ene plaece, k' èn ôte esteut po-z awè dvant vos.

7. avaler raddimint et galafmint. Alê, dj' irans ndè shofler ene. Il ont shoflé l' boteye. Li dorêye a bénrade yeu stî shoflêye. rl a: riloper, lofter, sicroter, sikerweker.

8. taper ene bafe a. Dji t' va shofler. F. gifler.


III. [v. a "i"]

1. fé grande air. I shofele a bouxhî tot djus (ramexhné pa J. Haust). F. faire grand vent. >> û‡a shofele do mwais costé u: i shofele do måva trô: i bijhe.

2. gn awè on tirant d' air. Come ça shofele, chal ! F. y avoir un courant d'air.

Etimolodjeye: latén sufflare (minme sinse).


| shoflé, shoflêye [addj., purade padvant]

1. gros, bômel. Il est tot shoflé.. Loukîz a: shofleu d' poes. F. replet, bouffi(e), grassouillet(te), dodu(e), rondelet(te), potelé(e).

2. shoflêye H (mot d' linwincieus) no del lete H k' on prononce tot shoflant. On dit eto : H prumioûle. F. H aspiré.


Parintêye :

Mots d' aplacaedje :

Omonimeye coinrece :

  • choufler est disfondowe di "shofler" eyet di "xhufler"