Napoleyon II

Napoleyon II, c' est l' no k' on dna, après côp a Napoléon François Joseph Charles Bonaparte, li fi da Napoleyon Bonapåre avou s' deujhinme feme, Mareye-Louwisse d' Otriche.

I skepia li 20 di måss 1811 a Paris et mora li 22 d' djulete 1832 a Wîne.

Biyografeye

I fourit lomé «Rwè d' Rome» pa s' pa.

Après l' dobleure ki Napoleyon atrapa al batreye di Brinne-l'-Alou, i fourit evoyî e l' Otriche avou s' mame. C' est la k' i crexhrè, et mourrè come on nôbe otrichyin, sins måy poleur rivni e l' France. Låvå, i rçuva l' tite di «duk di Reychtate» (pitite dutcheye del Bohinme).

E 1830, on sondja a lu pol trône di Beldjike, mins lu n' end aveut d' keure (il åreut yeu ptchî li ci d' Grece u d' Pologne).

C' esteut on bea valet, foirt enaiwé dins l' trevén romantike.

Dins les belès-letes e walon

Antoine-Joseph Alexandre, dins s' live «Virdjile a Måtche avou ses bierdjîs» endè cåze come li ci ki va rvindjî s' pere, tot-z apoirtant l' påye et l' abondance e l' Walonreye :

Twè l' saedje dame, dji t' è preye, prind bén sogne di l’ efant,
D’ l’ efant k’ Mareye-Louwisse a dné å concwerant,
(…)
Dvins pô d’ tins on t’ vierè, après ene kimaxhreye,
Rilure å prumî rang del France tote sibarêye.
C’ èst ti k’ nos frè rovyî tos nos ancyins måleurs.
Et k’ on vierè infén porminer so des fleurs.
Blûcher et Wilinton n’ seront pus k’ des gribouyes,
Et les sôdårds do Nôr tronnront tot come des foyes :
To ls abatrès tertos, tot come on scheut des poes,
L’ påye rivénrè avou el vinkixheu des rwès.
(…)
Les Rûsyins n’ sont nén blancs, ca les Francès e masse
Iront tot k’ a Moscou les csaetchî pa l’ tignasse.
(…)
C’ est por ti ki l’ tere toûne et k’ on voet dvant l’ solea
Rôler on firmamint ki dvént todi pus laid ;
Coraedje ! divén vite grand, et k’ nos t’ veyanxhe èn ome,
Pusk’ on t’ a batijhî do no di ptit rwè d’ Rome.
(…)
Kimince, pitit schirlou, do rire a tes parints ;
Ti mere a stî dijh moes dvins des bén grands tchagrins.
Riconsole nos tertos; mostere ki to sais rire :
Mostere tu dispierté, po pretinde a l’ impire.