Nervyins

Èn årtike di Wikipedia.
(Redjiblé di Nervyin)
Potchî a: naiviaedje, cweri

Les Nervyins (Nervii e latén) fourît ene des pus pouxhantès tribus del Confederåcion beldjike ki viként å Levant di l' Aiwe d' Escô dins l' mîtrinne Belgae do tins des Romins.

Li date egzake di leu distrujhaedje n' est nén cnoxhowe. Il estént veyous come les pus waeraxhes des tribus beldjikes. Li Belgae esteut metou a pô près dins çou k' est asteure li Beldjike.

Leu tuzance esteut foirt sitraegne. Il avént tchoezi di n' nén boere des alcolijheyès abwessons, ni di profiter nerén des ôtes plaijhis, ca i pinsént k' leu-z esprit dveut tofer dimaner clair po-z esse coraedjeus.

Les scrijhaedjes ki nos avans rapoirtèt k' i n' avént nole classe di martchands ou vindeus, çou ki leye pinser k' i n' avént pont d' manoye eyet k' il estént motoit nén foirt ritches ou avancîs.

Aidîs dås Atrebates eyet Viromandwins et co d' bråmint ds ôtès tribus djermanikes, il ont cåzu batou Djule Cezår e -57 (batreye di Sambe).

Les Adouwatikes (Atuatuci), ene ôte tribu, estént sol voye po les radjonde mins i n' arivît nén a tins pol batreye. Ça fwait k' al fén des féns, les Nervyins ont yeu ene dispoûslêye.

Après cisse batreye la, bråmint des tribus del Belgae s' ont rindou, mins nén les Nervyins. I n' ont nén accepté l' påye di Rome; i n' ont pont evoyî d' ambassadeurs nerén. Il ont continouwé a-z ataker les convoyes rominnes.

Cezår adjinçna-st on plan k' acontéve bén ki les Nervyins n' avént pont d' cavalreye. Et, come d' efet, il adierça s' côp.

Après leu dzindjnaedje pås Romins, il ont dmandé po èn årmistice.

Les scrijhaedjes rapoirtèt kel sitouwåcion esteut tele ki leu-z årmêye di 60.000 n' esteut pus k' di 500, eyet leus 600 moenneus n' estént pus k' troes.

Dandjreus k' Cezår lezî dna l' påye k' i dmandént, eyet dire a leus vjhéns di n' les nén ataker.

I shonne kel mwaisse-veye des Nervyins åye sitî Bagacum (Bavai).

Totes les cnoxhowès dnêyes so les Nervyins vinèt do scrijhaedje “Li Guere des Gåles” pa Djule Cezår. Dabôrd, ça s' pôreut bén ki sacwantès sacwès soeyexhe ene miete candjeyes po bouter al tcherete des Romins. Mins, onk dins l' ôte, çou k' est raconté dins "Li Guere des Gåles" a stî aveuri pa des ôtes sourdants.

Les "Nervyins", c' est eto l' no del dramatike di Préle, la k' on vout kel Batreye di Sambe s' åye passé.