Rima so les viyaedjes

Pol discramiaedje des årtikes avou l' mot « rima », loukîz cial.

On rima so les viyaedjes, c' est des ptits arimés fwait so ene shûte di viyaedjes do minme vijhnaedje.

Rimas avou l' diåle

C' est des rimas k' atakèt pa «A (viyaedje ki finit pa -our), li Diåle î court».

Rima d' Our

(prononçaedje coinrece)

A Our, li diåle î court; a Maissin, on l' ratind; a Anloe, on l' fote sol toet; a Glaireuse, on lyi fote del tchenveuse; a Viyance, on lyi fote so s' panse; a Transene, on lyi fote so s' schene; a Smu, on lyi fote so s' cou et ås Libins, on l' pind.

Variante: … et ås Libins, on l' fwait lancî pås tchéns.

Rima d' Marcour

(prononçaedje rifondant)

A Marcour, li Diåle î court, a Macrai, il î brait, a Djoupeye, i mareye ses feyes, a Warezi, i mareye ses fis, ey a Ciele, i monte å ciel.

Kitoirdous rimas del minme cogne

C' est deus modêyes d' on rima so Wîcoû. Onk vént do papî Bourguignon, l' ôte do motî d' Bastogne.

modêye Bourguignon

A Wîcoûr, la chite î coûrt
A Ratchamp, i la ratnant
A Hardègni, on la lêt cori
Avâ l’ pachi
Do vî Hardi

modêye Francård

A Wîcoûr, la chite î coûrt
A Ratchamp, i la ratnant
A Hardègni, i la lêssant cori
Su la gueûye des cis d’ Bourci
Doû çki l’ Diâle è fêt s’ ni.