Henri Pétrez

Henry Petrez, on scrijheu e walon, sipoté el Baron d' Fleuru a skepyî e 1886 et mori e 1967. Il a moussî dessineu dins ene casrolreye a l' ådje di 13 ans. I va aprinde a scrire e walon avou Jean Wijns et rexhe docô des pîces di teyåte eyet des tchansons. Li prumire did zeles, "On concours di galants", fourit ene operete, djouwêye e 1909. I moussa-st a l' A.L.W.A.C. e 1908 et ås Relîs Namurwès e 1920. E 1948, i vude on limero des Cahiers Wallons rén k' por lu, avou deus ramexhnêyes di powinmes "L' an cwarante" eyet "Fleurs et fruts". On rmete ça e 1953 et c' est "Moman" ene longue powezeye po s' mame.

Mins Hinri Petrez, c' est aprume les "Fåves do Baron d' Fleuru", des fåves ki li prumire volêye mousse foû e 1928, li deujhinme e 1933, li troejhinme e 1950, li cwatrinme e 1956 eyet li cénkinme e 1999, après si moirt. C' est des fåves å pus sovint a môde da Lafontinne avou des biesses, mins måy ricopieyes so Lafontinne. Les prumîs sont wårnis di beas dessins e coleur da Elizabeth Ivanovsky.

Troes covietes des "Fåves do Baron d' Fleuru".

Si a-t i scrît troes lives di proze: "Fleuru dins m' vicåreye", publiyî e 1960, eyet "Tambu Tambe, blanc negue" et "Mi testamint di scrijheu", les deus dierinnes nén eplaideyes. A stî relî come mimbe del S.L.L.W. e 1932 et a rascodou li pris do govienmint po "Fleuru dins m' vicåreye" e 1962.

Hårdêye difoûtrinne

Li pådje do Baron d' Fleuru.