Federåcion Walonreye-Brussele

Li cminålté Walonreye-Brussele (C.W.B.) si lome pus sovint kiminålté francesse di Beldjike 

C' est ene institucion ki s' ocupe del culteure, di l' acsegnmint et co sacwants ôtes pititès sacwès (odiovizuwel, spôrts) so èn aroyaedje ki rascovere li pus grande pårteye del Walonreye (apus kel kiminålté tîxhon-cåzante), et Brussele. Mins a Brussele, n a eto, sol minme sitindêye, li cminålté flaminde. 

Li cminålté francesse a sovint stî moennêye pa des Brusselwès. Çou ki fwait ki sacwants interesses des Walons, inte di zels, li diswalpaedje do lingaedje walon, ont stî metous sol costé. Metans dins les cwårs dinés å CLRE po schaper les ptits lingaedjes del Walonreye, la kel walon riprezinte a pô près 75 åcint des ki-pôrént-esse djåzeus.

Sacwants waloneus ey eto des dislaxhiveus ont dmandé dispu bele ådje li raloyaedje del kiminålté francesse al Redjon walone, come li cminålté flaminde s' aveut tot timpe raloyî al redjon flaminde po fé l' Flande.

E 2008, pol prumî côp, li prezidint del Redjon walone et del kiminålté francesse, c' est l' minme djin : Rudy Demotte.

Po des linwincieusès racsegnes sol mot "kiminålté u cominålté / cminålté", alez s' vey e splitchant motî.

Li CWB dins les rlåcions eternåcionåles

Li CWB est onk des mimbes del francofonreye. Çou k' est co on côp drole, ca l' Beldjike tote etire, leye eto, est on mimbe di cisse soce la. Ça fwait k' po les minmes administrés, gn a deus minisses ki s' paynut l' voyaedje po-z aler ås mwaisses raploûs del Francofonreye.

Hårdêyes difoûtrinnes

• Ene Walonreye sins ricnoxhance des Walons (tecse da da Jean-Claude Somja po mostrer li toursiveusté del CWB po les Walons, eplaidî dins l' live "Ké walon po dmwin ?", 1999)
• Li minme sicrijhaedje, pus diswalpé, e francès