Macsådaedje des studiants mecsikins (1968)

Li macsådaedje des studiants mecsikins u macsådaedje del plaece des Troes Culteures si passa li 2 d' octôbe 1968 a Mecsico.

E moes d' setimbe gn aveut ddja yeu, a Mecsico, ene bataye etur les studiants et les policîs k' aveut fwait dijh-ût moirts.

Li deus d' octôbe, nouv djoûs divant li cminçmint des djeus olimpikes, des policîs e civil s' avént metou a l' awaite ås vites des måjhons tot åtoû del des Troes Culteures et avént mitrayî les studiants.

Oficirmint, on n' anonce ki cwarante moirts mins l' verité c' est k' end a yeu dipus d' troes cints. Tos les studiants ki trinnént foû ont stî ramassés so les voyes et reclôs dins des prijhons foirt lon erî del veye capitåle. 

Consecwinces del touwreye

Droldimint assez, gn a pont yeu d' manifeståcions totavå po les studiants touwés. Et nerén, pont di mançaedje po boycoter les djeus olimpikes. Dandjreus paski, di ç' tins la, les medias n' estént nén co diswalpés. Adon, on n' a waire cåzé d' l' afwaire, et les djeus s' ont bén passés.