Jay Pritchett

Ed O'Neill, ki djowe Djaiy Pritchett.

Jay Pritchett ou Djaiy, c' est on persounaedje do fime Modiene famile, djouwé pa Ed O'Neill.

Djaiy shonne esse li sondjeu amerikin coirzenoxh. Il a skepyî pôve, poy il a tuzé et rtuzer et racatuzrè-tu, disk' a tant k' il a edvinté des dresses. Aprume avou on soçon, il a metou l' afwaire so pî so fotche, poy les deus s' ont dispårti, tchaeke avou s'-t afwaire da lu. Sifwaitmint, Djaiy a yeu l' copagneye Closets Closets Closets ("Dresses"), et si wangnî bråmint des cwårs.

So ces trevéns la, il esteut maryî avou Dedêye, ey awè eshonne deus efants: Claire et Mitchî. Prins pa l' ovraedje, i n' a nén yeu l' timp d' aclever ses enfants. Il esteut foirt près di s' feye, mins il a tot fé må avou l' valet. Il a tribolé l' Mitchî avou l' fotbale et totès sôres di spôrt, avou des agayons veyous come bons po les omes, mins l' Mitchî s' a sintou tourminté pa tot ça. Cwand Mitchî a cfessî k' il est gaiy, Djaiy n' a nén sepou responde a môde di djin, et ça a metou les deus djins co pus lon n' onk di l' ôte. Mins avou l' timp, Djaiy s' a rapinsé.

Po fini, i s' a dismaryî d' avou Dedêye, et trouver ene djonne feme, leye disvoirceye eto, Gloriya, tot si djonne ki l' feye da Djaiy. Eshonne, Djaiy et Gloriya ont fwait on efant, Djô.

Djaiy vout fé acroere k' il est on vraiy ome, onk ki n' brait måy, onk ki n' lait nén ses sintimints abizer foû d' lu. Cwand i lyi arive a braire, i dit ås ôtes ki c' est pask' il a pelé on agnon, ou k' il a on fyi d' poussire dins l' ouy. I n' est nén a s'-t åjhe cwand des ôtès djin l' volnut rabressî. I roveye tofer les djoûs d' fiesse di s' côpe. I s' escuze todi, å dire ki s' prôpe pa da lu aveut sitî co pus deur, et k' i n' elyi aveut jamwais dné on betch.

Si mwaisse-passions, c' est l' goufe (sipôrt). Il est dins on clobe di golfîs, ewou k' i va tofer po djouwer et po foumer des cigåres. Il inme pexhî tot seu, ou s' pormoenner tot seu dins les bos, et waitî les mouchons. I s' rafieye eto do fotbale, ey aspaler s' bea-fi Cam å fé fotbalî les råpéns.

Cisse pådje ci n' est co k' on djermon, dj' ô bén k' el pådje est djusse sibåtcheye, eyet co trop tene ; et s' divreut ele ecråxhî ene miete. Si vos avoz des cnoxhances so ç' sudjet ci, vos nos ploz aidî, clitchîz sol loyén « candjî l' pådje » po radjouter des informåcions.