Les biesses acsûtes del pesse (fåve)

Les biesses acsûtes del pesse, c' est ene longue fåve da Lafontinne.

Tinme

C' est l' pesse ki towe totes les biesses. Leu rwè, li Liyon les ahouke tertotes po fé on sacrifice rilidjeus å Cir k' evoye cisse rascråwe la. Ci serè li biesse k' a fwait l' pus gros petchî ki serè touwêye. Li Liyon cmince pa s' acuzer lu-minme, d' awè magnî des bedots, et pår li bierdjî, mins passe li cratchoe ås ôtès biesses po k' ele si cfessexhe, avou. Sabaye kî çki serè relî ?

Ratournaedje da Devivier de Streel

L' abé Dovevî va rmete ene fele paltêye ås 64 vers del mwaisse modêye, poy ki s' fåve divént pår ene fåvirete di 268 vers. Loucans ddja li cminçmint.

On må ki fjheut setchi d' oreur,

On må ki l' Diåle, li pus grand et l' pus noer,

E fond d' l' infier a-st edvinté;

On må k' on tronne rén k' d' î pinser,

Mågré sint Rok et sinte Djenvire;

On må k' on n' endè doet måy rire

Di sogne di l' atraper

Si l' cloke di Rome vineut-st a souner;

Li Pesse, infén, li pus grand d' tos les mås

On bea djoû s' vora so les biesses.

Lumçon, halene, foyon, sori, rat et cwate-peces

Ågne et chamo, boû, vatche et tchvå,

Oûsse, mårticot, tchén, leu et rnåd

Morếnt tertos come des moxhes.

Pus nou råskignoû so ene coxhe...