Emission e walon

Ene emission e walon, c' est ene emission al radio u al tévé la k' on cåze e walon. On î radjoute eto les emissions k' on î cåze do walon, mins e francès.

Afitche éndjolike di l' emission "El tchant d' no cok" da Jean Goffart so Radio-Quartz

Jean Goffart tins di si emission e walon "El tchant d' nosse cok"

Imådje:Posse2.jpg

Lucyin Mahin (a hintche) et Pablo Sarachaga (å mitan) priyîs a l' emission "900.000 Walons", avou Paul Gilles (a droete, di dos)

live so les emissions 2020 da Bernard Van Vynckt

Sacwants emissions e walon dins l' posse

Les emissions e walon sol RTBF ont-st ataké diviè les anêyes 1960 al radio. A Nameur, ça a stî 900.000 Walons, ki l' prumî mwaisse adjinçneu fourit Gilbert Renson. Paul Gilles î a bouté lontins, come tecnicyin, pu come prezinteu. Avou Charles Massaux et Jean Bauduin.

Sinnes di l' emission 900.000 Walons

• 
• 
• 
• 
• 

A Lidje, li "Shijhe walone" est l' pindant di "900.000 Walons". Les deus emissions continouwnut disk' å djoû d' ouy (avou Jany Paquay a Nameur eyet Jacques Warnier a Lidje).

Mins do côp après, gn a yeu des emissions e walon so les libès radios. Inte di zels, "Jumet 600" a Djumet eyet totes sôres d' emissions prezintêyes di Jean Goffart. Si dierinne, "El tchant d' nosse cok" so Radio-Quartz a Sombrefe, a stî ene des prumire a-z esse evoyeye so les fis.

Après Lidje, gn a yeu lontins les "Mots walons" da Guy Fontaine. Asteure, gn a eto les biyets d' oumeur walons da Paul-Henri Thomsin (Liège-matin).

Do costé d' Nameur, gn a des emissions da Bernard Louis et sol Walonreye di France da Charles Massaux.

E 2020, li libe radio crustinne di Nameur, RCF, a fwait des emissions e walon avou Bernard Van Vynckt. Les mots del prumire anêye ont stî eplaidîs dins on live «Rastrind, saiss».

Sacwants emissions e walon al tévé

Al tévé, gn a yeu ene clapante emission so Lidje, "Radjoû", la ki totafwait esteut e walon, les kesses, et sovint les responses des priyîs. Li prezinteu-dmandeu, c' esteut Claude Balthazar. Elle a stî shuvowe di "Wallons-nous", produte å cmince pa Guy Fontaine, pu pa Ludovic Bastin. Mins, pitchote a midjote, les kesses (et, dabôrd, les responses) ont stî dmandêyes e francès. Wice alans dj' ?

Les tévés coinreces emantchèt eto des emissions e walon. Gn a yeu so "Canalzoom" Kè diss ? adjinçnêye pa Yves Paquet. Sol Hinnot, gn a Berdelaedjes, la k' on-z a prezinté li prumî tévéfime e walon (da Albert Volral).

Emissions e walon sol Daegntoele

Li prumire k' a stî redjiblêye sol Daegntoele fourit l' emission "Li tchant d' nosse cok" da Jean Goffart (so Radio-quartz, di Sombrefe, dispu 2005).

Dispu 2007, gn a eto deus emissions da Bernard Louis, (« Eshonne » Emission walone et francesse avou èn årmonak walon, del literateure, des spots et des ratourneures eyet « Vive Nameur po tot » avou des tchansons e walon) ki passèt so Cyclone-RCF di Sint-Mår ki rpasnut après sol Toele (Waibe musicadeon).

Hårdêyes difoûtrinnes

• Pådje so les emissions e walon (so l' Aberteke, dedja ene viye modêye, nén rapontieye)
• Waibe di Radioquartz, la k' gn a ene emission e walon li dimegne di 8 eures a 10 eures bedje (7 eures a 9 eures å matén ECG di l' ivier, eyet 6 eures a 8 eures å matén GMT di l' esté)
• Waibe Musicadeon, la k' gn a ene emission e walon les londi & mårdi a 6 e. et dmeye al nute, eure di Walonreye (4 eures et dmey di l' après-nonne ECG di l'ivier, eyet 5 e. 30 di l' esté)