Rebanêye comene

Ene rebanêye comene (on dit eto: ene intité), c' est ene comene askepieye pa rebanaedjes (rabindlaedje administratif) di sacwants ptits bans (viyaedjes et veyes) di dvant ki sont vjhéns.

El Beldjike, li prumî d' djanvî 1977 i gn a-st avou on grand candjmint des aroyaedjes administratifs di cåzu totes les ancyinnes comenes, k' ont stî rbanés disk' a ene vintinne eshonne. On a lomé çoula les Grands rebanaedjes.

Sovint, les viyaedjes ont-st adon candjî leu limero del posse.

Les comenes del Walonreye di France ni sont nén rebanêyes.

Vey eto: djivêye des rebanêyès comenes del Walonreye, eyet des bans di dvant les rebanaedjes ki les compôzèt.

Novelès comenes ki leu no n' esteut nén ene comene divant

• Bruniô, la-minme: Brëniô
• Colfontinne, la-minme: Colfontène
• Faime
• Ferneamont
• Flémåle
• Fraine-dilé-Anvegn
• Les Bons Viyés
• Les Brouhires, la-minme: Les Brouwêres
• Li Noû Lovén
• Li Noûpré
• Li Trô
• Manhé
• Mont-d'-l'-Inclû
• Onele
• Sambveye
• Sinte-Oude
• Troes-Ponts
• Vå-so-Seure
• Virwinvå

Sourdant : live so les comenes del Walonreye da Herbillon

Prumirès sayes di rebanaedjes divant 1977

Pondants et djondants

E 1964, li minisse di l' interieur d' adon, li Joseph Michel, a vlou sayî di rmete eshonne sacwantès ptitès comenes. Ci n' esteut nén sol dimande des djins. Metans, dins les ptits viyaedjes di l' Årdene, les comenes avént sovint bén l' moyén et i n' tinént nén a-z aler dner leus sôs a des pus gros viyaedjes ki n' estént nén si ritches.

Egzimpes di rebanaedjes e 1964

• Coirnîmont, Grå-Fayi et Bayamont ont stî rmetowes avou Wajî.
• Belfontinne, li Ptit-Fayi ont stî rmetous avou l' Moncea.
• Les Tchairires et Mouzaive ont stî rmetowes avou Yåle.

Egzimpes di rebanaedjes e 1969

• Tchôkire avou l' Hôte Flémåle.