Tchårlote di Beldjike

Tchårlote di Beldjike, e-n espagnol Carlotta de México (Tchårlote do Mecsike), c' esteut l' seule feye do rwè Yopôl Prumî et del royinne Louwisse d' Orleyan (k' avént eto deus fis).

Ele sikepia li 7 di djun 1840 a Låken et mora li 19 di djanvî 1927 a Meise.

Di s' mariaedje avou Miyin d' Otriche (1857), ele divna imperresse do Mecsike (1864-1867).

Vicåreye

Ele dimora deus grossès anêyes e Mecsike. C' est leye ki tneut l' pot droet cwand si ome n' esteut nén la. Ele aveut l' idêye di mintni låvå on sistinme di rweyålté et d’ fwè catolike. Ca les Mecsikins vinént di declårer ene republike layike (1857). Shuva l' abrocaedje des Francès da Napoleyon III, ki declara l' impire, et diner l' trône a Miyin d' Otriche ki divna impreur do Mecsike e 1864.

Mins l' impreur francès Napoleyon III rihouca ses sôdårds ki sotnént li povwer imperiå.

Tote seule, ele decida d' eraler e l' Urope dimander d' l' aidance a Napoleyon III et å Påpe Pî IX.

Mins ele pierda ses tåtes, estant a Rome. Les docteurs li fjhît reclôre. C' est adon ki si ome esta fuziyî påzès revinteus mecsikins (e moes d' djun 1867). Mins ele n' è sepa rén.

Si famile li fjha raminer e l’ Beldjike. Ele vica co cåzu swessante ans foû do pazea (come ene dimeye doûce). Mins on n' è sava måy li fén mot.