Cwarmea d' Måmdiy

Cwarmê d' Mâm’di

Sinne do cwarmea (masses)

Li cwarmea d' Måmdiy (la-minme : lu cwarmê d' Mâm’di, lu cwarmé d'Mâm'dî), c' est ene mascaråde k' i gn a tos ls ans a Måmdiy, troes djoûs å long, do dimegne di dvant l' cwareme, disk' å crås mårdi a meynute.

Gn a bén 2000 diguijhîs pol cwarmea d' Måmdiy.

Les persounaedjes do cwarmea d' Måmdiy

Li Boledjî, onk des mwaisses persounaedjes, saye d' eforner ene riwaitante, tot l' sorlevant pa s' dirî

• li trouvlé, avou s' rodje costume. C' est lu ki replaece li mayeur tins des troes djoûs do cwarmea. Po çoula, li semdi, i rçût ene trouwale, k' est l' essegne di s' povwer. Adon, po rmerciyî l' mayeur di lyi aveur diné les clés del veye, i fwait on spitch di "politike måmdiyinne".
• Li haguete k' enonde li mascaråde do dimegne, tot dansant l' danse del haguete. Avou si hape-tchå, il apice les rwaitants pa leus bodenes, et ls oblidjî a s' mete a djnos po lyi dmander pardon. On l' broûlrè so on braijhisse.
• Li grosse police, moussî d' on bleu sårot, et d' ene blanke marone. Il anonce li cwarmea avou lu clabot.
• Li djoupsene (onk des pus vîs masses do cwarmea). Elle est mousseye d' on blanc lénçoû, et d' on fås-vizaedje avou on betchou nez. Ele cwirt après l' amagnî.
• Li vexhoe (lu Vèheu, li pus vî masse). I bouxhe sol tiesse des djins avou ene vexheye di pourcea.
• Li såvadje.
• Li sotea (lu sotê).
• Li Hårlikin et l' Pierot. Li Hårlikin tijhnêye les djins avou l' cawe di rnåd di s' tchapea. L' ôte dene des pemes d' amour et des djaeyes.
• Les Longs-Nez : i xhinèt onk u l' ôte, et l' shuve disk' a tant k' elzî payaxhe ene tournêye.
• Li Longuès-Bresses : difûle les djins avou ses longous bresses.
• Li Long-Ramon : i martoke les tiesses des djins di s' ramon avou ene foû longue cawe.
• Li Boledjî : avou si eforneuse, i saye d' eforner les rwaitants tot lzî sorlevant leu drî.
• Li Coibjhî (lu cwapî) : i prind mezeure des pîs des loukeuses.

Ôtès tropes

Afitche del soce "Londi Mâmdi Todi"

Li SNR "Londi Mâmdi Todi" fwait on "måssî toû" l' londi do cwarmea.

Sicrijhaedjes e walon sol cwarmea d' Måmdiy

Prôze

• Troes contes da Jean-Marie Masset : onk des troes, "Li moxhe", si passe li mierkidi des cindes a nole eure å matén.
• Les discours do trouvlé sont sovint eplaidîs dins Lu vî sprawe.

Tchanson sol cwarmea

(e rfondou, pu avou l' accint d' Måmdiy)

Li Cwarmea d' Måmdiy (Lu cwarmê d' Mâmdî)

Li cwarmea d' Måmdiy (Lu cwarmê d' Mâmdî)

On l' tchantrè todi (Ô l' tchâtrè todi)

Do pus grand disk' å pus ptit (do pus grâd djusk' â pus ptit)

Li cwarmea d' Måmdiy (Lu cwarmê d' Mâmdî)

Et ses melodeyes (Èt ses mèlodîes)

Ni seront djamåy rovyîs (Ni serant jamês roûvîs)

Difoûtrinne hårdêye

• Videyo do spitch do trouvlé e 2007

• 
  Macrales
• 
  Diguijhîs
• 
  Tchår sol clonaedje
• 
  Cwarmeus e bleus sårots, avou l' catedråle padrî
• 
  Responsåve do cwarmea avou l' braijhisse po broûler l' haguete padrî
• 
  Årmonreye