Wikipedia:Pocwè l' wikipedia e walon eploye li rfondou

(a epådjner/ecråxhî)

Oyi, li wikipedia walon est e rfondou; c' est djustumint l' egzimpe minme d' ene sacwè ki doet esse e rfondou, ça n' såreut nén esse ôtrumint: c' est po tos les walon-cåzants, k' i soeyexhe di Vervî ou d' Cînè, ou co di Djivet ou do Wisconsin, ou minme di Sint Djåke el Galice ou l' Kebek (awè, gn a des djins ki s' interessèt-st å walon å dfoû del Walonreye); eyet tertos polèt scrire, dj' ô bén ki c' est ene ouve colective, nén seulmint po l' tot, mins minme po tchaeke årtike. Do côp, cwè fåreut i fé cwand ene djin di Bastogne sicreye èn årtike, poy ene djin d' Nameur vént radjouter des informåcions? Aveur l' årtike e fonetike-Feller avou l' mitan dins on scrijhaedje et l' ôte mitan dins èn ôte? Et cwand on 3inme, on 4inme evnd. vénront radjouter des bokets? Et co d' pus: pol ricweraedje (paski c' est ene des beatés des eciclopedyes electronikes: on pout cweri des afwaires bén pus åjheymint k' avou ene so papî), kimint pôreut on cweri èn årtike si on n' sait nén ddja cmint k' il est scrît si ça candje sorlon l' oteur. Mins, come dit pus hôt, si vos n' savez nén scrire e rfondou c' est nén on problinme, sicrijhoz come vos ploz/come vos vloz, et ene sakî ou l' ôte li riscrirè e rfondou (eyet ossu fé li "wikifiaedje", le metaedje e cogne avou tote li sintacse po les loyéns, epådjnaedje, evnd.). Sicrijhoz come vos vloz, djusse ni soeyoz nén sbarés d' vey ki les tecses sont rcandjîs (et nén seulmint po l' ortografeye; c' est l' principe minme do wiki: on tecse n' est da nolu, dj' ô bén il est da tertos, et tchaeconk el pout candjî, ecråxhî,...)