Sordjoû

sordjoû des rwenes rominnes di Volubilisse, e Marok

Pol discramiaedje des årtikes avou l' mot « Sordjoû », loukîz cial.

On sordjoû, e fotografeye, c' est on portrait saetchî cwand ene loumire loume did pa padrî so çou k' on vout fotografyî, dismetant ki l' aparey (u l' fimrece) riwaite li sourdant del loumire. Ça fwait ki çou k' on vout prinde e portrait est metou inte les deus. Dabôrd, i va rexhe come ene ombrire.

Condicions des sordjoûs

Come li mwaisse-sudjet aparexhe come ene ombrire, les detays èn sont nén veyåves, eyet li contrasse inte çou k' est loumé et çou k' est e spexheur est pus grand, çou ki mete en avant les fômes eyet les cotoûs. Sovint, c' est l' solo (copurade cwand i s' leve ou s' coûtchî) k' est l' sourdant del loumire; mins ça pout esse eto ene foite lampe pa drî l' mwaisse-sudjet, po les fotos e studio, u minme ene loumire d' airaedje, cwand l' aparey si trouve dins ene coine wice k' i fwait pus spès.

Sôres di fotos e sordjoû

Sordjoûs rcwerous et sordjoûs haeyis

A cåze del loumance do sourdant d' loumire, i fåt pa côps djouwer avou l' båcnire di l' aparey po bén fé les fotos:

• Si on vout prinde li sudjet comifåt. Adon, i fåt drovi pus foirt li trô del båkete di l' aparey. L' erî-fond serè foirt clair.
• Si on vout prinde li sudjet come ene ombrire, dins ene bele loumire d' erî-fond, adon, i fåt rserer l' diyafrague.

Sacwantès fotos ki n' vont bén k' e sordjoû

consire e sordjoû

• Sibarantès fotos d' djins (on n' vout nén k' on voeye leu vizaedje; leu-z ombion doet esse ewaerant).
• Po vey les ombraedjes ki sont d' vosse costé (li seul moyén di bén vey des consires, metans).
• Åbes, montinnes, evnd, k' ont des clapantès cognes.

Tecnike do prindaedje des sordjoûs

Avou les apareys å fime

A Amersfrane, e Marok, ene montinne ki rshonne a ene catedråle

So ls apareys k' on pout régler lu-minme, vos ecådrez vosse portrait, eyet li loumire k' arive sol celule di mzurmint vos va mostrer li drovaedje del båkete di vost aparey. Mins si vos l' leyîz insi, les plaeces avou del loumire seront bråmint trop claires. I fåt passer å réglaedje al mwin (ki va bouter å pus sovint å cintinme di sgonde), et fé on drovaedje deus a cwate côps pus stroet kel ci ki vos åreut dné ene foto otomatike å cintinme di sgonde. Les ombraedjes seront co bråmint pus noers (mins ça, on nd a d' keure), mins adon, les plaeces avou del loumire åront leus vraiyès coleurs. Si c' est l' sudjet ki vos vloz bén nete, i fåt fé å rvier (diyafrague deus côps pus lådje drovou).

So des apareys k' i gn a, gn a on boton po dmorer en otomatike, mins prinde djusse li mitan u l' cwårt del loumire k' el celule aveut mzuré (po les soleas-djus). Po les sudjets e sordjoû, i fåt tourner l' boton årvier (li dobe u deus côps l' dobe di loumire).

Avou les apareys sins fimes (éndjolikes)

I vos fåt tchôkî sol boton "Menu", la k' vos ploz candjî l' espôzicion (pus foite u moens foite). I fåt schaper vosse tchuze (boton "i va").

Po des sudjets dins l' sordjoû, gn a èn ôte réglaedje lomé spot. Vos l' boutez; vos schapez vosse tchuze, pus vos metoz vosse sudjet bén å mitan del waitroûle. L' aparey ni va aconter kel loumire k' i gn a å mitan do sudjet.