Nicole Goffart

Nicole Goffart a skepyî li 15 di fevrî 1939. Elle a crexhou e-n on hamtea : les Trîxhes sol Hôte Flémåle.

Di s' mestî elle esteut dame di scole.

Ouve e walon

C' est ene sicrijheuse di d' pîces di teyåte e walon. Ses pîces sont-st aprume djouwêye pa li Scanfår di Serè.

Elle a rascodou ene cåkêye di pris.

Foû do teyåte, elle a scrît des arimés et des prôzes dins "Djåzans walon", "Intrez don" et l' "Bultén walon".

Elle a eto scrît des cåzaedjes di tchansons, tchantêyes pa Pierre Darras. Sacwantès tchansons sont-st a môde di paskeyes.

E 2024, elle est finalisse do Pris d' teyåte del Federåcion Walonreye-Brussele, avou s' pîce Li vwès dès sondjes.

Pîces da sinne

• Li tchant des rinnes (Pris Marcelle Martin 2001)
• Li stoele do bierdjî (2001)
• Li boune voye (èn ake, 2002)
• Cwand les andjes levèt l' rido (2003, Pris del bate UCW po ls etivådes di Måtche)
• "L' abeye di Sint-Måcrawe".
• "Li vwès des sondjes", creyeye a Måtche-el-Fåmene po ls Estivådes 2006 pal dramatike "Les cpagnons del sinne".
• "Li djouweu d' ôr".
• "Taijhoz vs, dji djåze" (Pris José Eddy Lantin, 2008)
• Padrî l' muroe (2007, avou Djôr Simonis).
• Li wiyete (2012)
• Les ciwagnes rivnèt tofer al minme plaece (2013).
• Po l' oneur del famile (2014)
• Les tchawes-soris da Boulboule (2015)
• Li måjhone des åmes pierdowes (2016)
• Les spenes des rôzes (2017)
• On fi d' trop (2018)
• Mi pere l' aveut bén dit (2018)
• Poyete a tofer råjhon (2019)

Ene di ses paskeyes

Dj’ a èn ordinateur

(so l' air Au lycée Papillon da Georgius)

I.

I n a bén lontins ki ça m’ trecassive / Di vey ki tolmonde aveut on PC / Dispoy des anêyes, veyoz vs, dji scrijheu / Avou ene viye machine tote presse a dhoter / Ossu, dji m’ deri / K’ il esteut grand tins por mi

Resploe 1

Dji n’ so tolminme nén si biesse / Et dj’ a on pô d’ instruccion / Dji frè bén clicli / Avou ene soris / Come tolmonde, nodino !

II.

Dji dmanda consey a des specialisses / Ki m’ ont dit tertos ki dj’ aveu råjhon / Ki dj’ esteu capåbe, avou ene boune notice / Di scrire mes ramtaedjes, et minme des tchansons / K’ èn ordinateur, / On s’ endè sieve so ene eure.

å resploe 1

III.

Ossu, on bea djoû, dji m’ leya-st adire / Et dj’ ala-st a Lidje cweri on PC / A l’ ome ki m’ sierveut, dji deri, tote fire / C’est un computêr que j’ voudrais-z ach’ter / Mais pas un trop grand / un p’tit pour les débutants.

Resploe 2

Dji n’ so tolminme nén si biesse / Et dj’ a on pô d’ instruccion / Et po fé clicli / Avou vosse soris / Dji prindrè des luçons.

IV.

L’ ome mi responda k’ c’ esteut l’ boune adresse / K’ e s’ botike, dji trouvreu foirt åjheymint / K’ i faléve aprume loukî al vitesse / Et al memwere po-z ovrer schayetmint / Roufler, dji n’ sai fé, mins dj’ n’ a nén co Alzémer

Resploe 3

Pinséve-t i k’ dj’ esteut trop biesse / Et Po shuve ses esplicåcions / Et k’ po fé clicli / Avou ene soris / Faleut-st esse on tchampion.

V.

Dispu ouy shijh moes k’ ça est el måjhone / Dji m’ sin ene ôte feme, ashiowe a m’ buro / Minme cwand dj’ voe m’ soris djouwer a comcom, / Sins poleur arester al plaece k’ i fåt / Mins dj’ fwai des progrès / Divins shijh moes, ça irè.

Resploe 4

Dji n’ so tolminme nén si biesse / Dj’ a minme on pô d’ instruccion. / Po fé fé clicli / A ene haeyåve soris, / I fåt d’ l’ aplicåcion.

VI.

Dj’ a portant sayî des truks di totes sôres / Do froumadje sol tåve et m’ tchet padrî mi / Pinsant k’ ça l’ pôreut rinde pus amiståve / K’ elle arestêyreut di m’ fé assoti / Mins n’ a rén a fé / Ele fwait djusse çou ki lyi plait.

å resploe 4

Paret k’ ces biesses la sont-st assez fråjhûles / Et k’ ele sont sudjetes ås rafroedixhmints / Dji lyi a metou, po l’ rinde pus voltrûle / On tapis dzor leye, mins ça n’ sieve a rén. / Ele n’ est nén froûleuse / C’ est ene soris rôbaleuse.

å resploe 4

VII.

Ouy timpe å matén, dj’ a-st avou l’ idêye / Do sayî del prinde pa les sintimints / Avou del muzike po fiesti si oraye / Dj’ a tolminme veyou on fameus candjmint ! / Li Tchant des Walons / L’ a rapåjhté po do bon.

Resploe 5

Ci n’ esteut nén co si biesse / N’ a nén mezåjhe d’ instruccion / S’ on vout k’ ene soris / Voye bén fé clicli / Lyi fåt dire e walon.

Resploe 6

Po rmete les idêyes e plaece / Di tot kî ki n’ les a nén / Siervoz vs del muzike / Ci serè madjike / N a tot ki rirè bén.

Hårdêyes difoûtrinnes

• Sacwants scrijhaedjes (so l' Aberteke)
• Co ene pådje so ses scrijhaedjes (sol waibe "Li walon d' emon nozôtes")