MicRomania (gazete)
micRomania, c' est l' gazete eplaideye tos les troes moes pal CROMBEL dispu 1992. Si no provént do grek micro (pitit) et do latén romania. Dabôrd, c' est ene gazete ki cåze des ptits lingaedjes vnous do latén, dj' ô bén les lingaedjes romans. Elle est drovowe ås oteurs di tote l' Urope, et minme ås oteurs creyoles.
Dins ç' gazete la les bokets sont todi eplaidîs dins l' lingaedje di l' oteur et rmetous vizon vizu dins l' lingaedje oficir del redjon d' l' oteur. Par egzimpe, on boket e walon rexhe avou s' tradujhaedje e francès, et on boket e galicyin rexhe avou s' tradujhaedje e-n espagnol. A l' atake di tchaeke limero, adlé l' tåve, i gn a ene mape po mostrer d' ewou vegnnut les oteurs des bokets.
C' est Jean-Luc Fauconnier k' est l' mwaisse sicrijheu di ç' gazete la.
Les oteurs del gazete sont sovint eplaidîs eto dins l' coleccion micRomania.