Modele:Mwaisse pådje/Årtike do moes
Gotye, d' ès vraiy no « Wouter De Backer », c' est on tchanteu, muzicyin ey on compôzeu d' muzike. Ci tchanteu ci est a mitan bedje ey a mitan ostralyin. Il a skepyî li 21 di may 1980, a Brudje.
Gotye, c' est èn escrijhaedje fonetike spontané do ptit no francès-cåzant : Gauthier. Come di djusse, sapinse a lu, Gauthier si prononce dinsi e-n inglès. Houte di çoula, Wouter, c' est l' varyisté neyerlandès-cåzante di « Gotye ». Dins li vraiye veye, on li spote pacô « Wally ».
Minme s' il a nexhou a Brudje, il aveut baguî e-n Ostraleye, cwand il ît deus ans vî. Il a dmoré ene miete a Sydney, pus il a bagué do costé d' Melbourne.
Il a todî djouwé del muzike voltî, tot-z estant gamén. La k' il a-st aprindou a djouwer diferints instrumints. Inte di zels, on-z ertrouve li piyano ey el batreye.
Tins d' ès laidådje, i djouwéve dedja dins ene binde novice avou ses camaerådes d' escole. Ci binde la s' loméve : « Downstares ». C' est laddé k' il a cmincî s' cårire, e 2002.
Avou ses oridjenes flamindes eyet des bokets d' ès famile ki vicnut laddé, il etind bén l' neyerlandès. Tolminme k' il a deur po l' cåzer. Il l' aprind timpesse gråce a des binde d' imådjes ki lét voltî.