Recsisse
Èn årtike di Wikipedia.
On Recsisse, c' esteut, istoricmint, onk k' shuveut l' pårti Rex (li Crisse Rwè), askepyî diviè 1932 pa Leyon Degrelle.
Les noûrecsisses ont rprin les idêyes des Recsisses.
[candjî] Les idêyes et l' istwere do pårti recsisse
C' esteut on pårti foirt catolike. Si no, c' est li pårti do Crisse-Rwè (e latén: Christus-Rex). Il esteut ecoraedjî pa bråmint des curés. Ås vôtaedjes di 1935, gn a yeu ene trintinne di Recsisses k' ont passé, copurade el Walonreye. Et aprume ei province di Lussimbork, ki vôte todi foirt catolike, et la k' Degrelle a vnou å monde (a Bouyon). Mins, cwand les Recsisses ont mostré k' i tnént pår avou Hitler, li cårdinå d' Malene a disfindou ås catolikes del co sotni (diviè 1938). I n' ont pus yeu k' ene dijhinne di pårlumintaires e 1939. Tins del guere, Degrelle tineut avou Hitler. Gn a des djonnes Walons do pårti Rex ki s' ont-st egadjî dins l' Wehrmacht, et esse evoyî å front d' l' Ess. C' esteut l' Batayon Walon. El Walonreye, les Recsisses aidént les Almands. I racuzént les Rezistants, et pacô les vni touwer. (Les Rezistants eto, touwént les cis ki fjént avou les Recsisses. C' est des Recsisses k' ont vni touwer François Bovesse. A l' Ofinsive da Von Rundstedt, gn aveut des eclaireus walons (des Årdinwès, ki cnoxhént bén les naxhes) avou les Almands, et motoit bén Degrelle lu-minme.
[candjî] Li movmint recsisse et les scrijheus e walon
- Joseph Mignolet esteut mimbe do pårti recsisse. Eto, après l' guere, il a stî veyou evi pa tos les waloneus. Li pris del veye di Lidje meta esprès dins s' reglumint k' i faleut on certificat de bonne vie et mœurs po k' Joseph Mignolet n' åye nén l' pris.
- Jean de Lathuy fourit eto ametou d' aveur fwait avou les Recsisses. Mins lu, c' esteut purade a cåze k' il esteut foirt catolike ki d' aveur fwait del politike.
