Stanislas Konarski

Èn årtike di Wikipedia.
Potchî a: naiviaedje, cweri
Stanislas Konarski

Stanislas Konarski (e polonès: Stanisław Konarski; di s' vraiy no Hieronim Franciszek Konarski; vinou å monde li 30 di setimbe 1700 a Żarczyce; morou li 3 d' awousse 1773 a Varsoveye, Pologne) fourit-st on pedagogue polonès, on resfôrmeu educatif, on scrijheu politike, on fijheu d' arimeas, on fjheu d' pîces di teyåte, on moenne des Piarisses eyet l' mwaisse précurseu do Sieke des Loumires el Pologne.

Medaye di 1765 avou l' poirtrait da Stanislas Konarski eyet l' sicrijhaedje e latén, «Sapere auso».

Di 1725 a 1727 Konarski studia å Collegium Nazarenum di Rome, wice k' il î divna acsegnant di retorike. Pus tård, po-z amidrer si educåcion, i fjha des voyaedjes el France, e l' Almagne et co e l' Otriche. E 1730 i rivna e Pologne eyet cmincî a-z ovrer so on novea eplaidaedje dezès lwès polonesses («Volumina legum»).

E 1736 Konarski cminça a-z acsegnî å Collegium Resoviense di Rzeszów eyet e 1740 i va fonder li Collegium Nobilium, ene sicole d' elite a Varsoveye, po les fis des nôbes («szlachta»). Pus tård, i resfôrma l' educåcion des Piarisses di Pologne, a l' asulon di s' programe educatif («Ordinationes Visitationis Apostolicae...», 1755). Ses resfômes ont divnou on pont consecant dins l' lûte do 18inme sieke pol modiernijhaedje do sistinme educatif polonès.

Å cmince, Konarski a stî asoçné politicmint avou l' Rwè Stanislas Leszczynski; mins pus tård i s' va aprepyî del «Familia» da Czartoryski eyet å Rwè Stanislas Auguste Poniatowski, tot pårticipant åzès rlomés «dinners do djudi». Stanislas Ågusse a fwait fé ene medaye a l' oneur da Konarski, avou s' poirtrait eyet l' sicrijhaedje e latén, «Sapere auso».