Toitche-linwe

On toitche-linwe c' est ene coûte fråze målåjheye a dire, paski des sons vijhéns rivnèt onk après l' ôte, mins motoit nén dins l' minme shuvaedje.

Dabôrd, c' est come si on vs toitchreut vosse linwe.

Egzimpes di toitche-linwe e walon

• djusse målåjheys a dire.
  • Loukîz Colas k' est la ki louke li lune ki lût.
  • I n a Colas k' est la ki louke et ki n' voet nouk.
  • Makes tu, la k' ti loukes, u loukes tu, la k' ti makes ?
  • Ene tcherêye di belès vetès setchès schetes.
  • Nosse bele grosse rodje poye cove inte li late et li tchviron.
  • Des bounès holès molès wåfes.
  • Li toû do cou do cok do clokî.
  • Å galop, galopea, el diale vos årè pa vos dijh årteas.
  • On frezé betchtåd ashiou so on strouk s' ecrouke tot magnant des petchales.
  • Cwate clawtîs clawèt cwate clås; si on clawtî clawe cwate clås, kibén d' clås cwate clawtîs clawèt i po leus cwate ?
  • On bea gros crås gris tchet avou ene bele grosse cråsse grijhe cawe.
  • Kén ake est ç' ? I n' a k' èn ake.
  • I n' a k' mi k' magne, et n' a k' ti k' boes.
  • On n' dit nén "ti" a mi; et si ti dis co "ti" a mi, mi, dji dirè "ti" a ti.
  • Si shijh cint swessante-shijh cinsîs suçrént so shijh cint swessante-shijh såcissons sins såce, ci sereut shijh cint swessante-shijh sots cinsîs.
  • Taijhe tu, ti, Toutou, t' as toirt; ti timpes todi tes tåtes.
• Ki vont fé prononcî èn ôte mot, måhonteus.
  • Les poyes do curé ponèt. (on va fini pa dire les coyes do curé).
• Målåjheys a dire, aprume dins sacwantès coines del Walonreye:
  • End a li dijhnut k' end ont et nd a ki dijhnut k' end ont nén; Mins end a dpus ki dijhnut k' end ont k' end a ki dijhnut k' end ont nén. Ås Scåssenes, ça s' prononce: i dd a ki dittënt k' i dd ont, et i dd a ki dittënt k' i dd ont nî; mins i dd a pus ki dittënt k' i dd ont k' i dd a ki dittënt k' i dd ont nî.

Toitche-linwe dins des ôtes lingaedjes

e l' arabe marokin

Egzimpe di toitche-linwe e l' arabe marokin كليت خيارة و جيارة و جليت جيارة لعشتي (klît xhiyyara wa xhiyyara wa xhellît xhiyyara li 3chati; dj' a magnî ene cawoûte et ene (ôte) cawoûte et dj' a leyî ene cawoûte po soper). Tot-z alant rade, on va prononcî كليت جرية (klît xhraya; dj' a magnî do stron).

==Hårdêye difoûtrinne==

• Mots walons avou des toitche-linwe (dedja studyîs sol Wiccionaire)