Årgone
L' Årgonne e-st ene redjon naturele del France, a tchvå so les dpårtumints del Marne, des Årdenes eyet d' Mouze. I gn a vaila bråmint des grands bwès et des vevîs. Onk des pus gros borks est Sinte-Menehould.
Li contrêye est cnoxhowe dins l'istwêre paski:
- c' est vaila, è viyaedje di Varesnes, ki li rwè Louwis XVI a stî apicî l' an 1791 ;
- c' est vaila k' gn a yeu l' grande bataye di Valmy, l' an 1792 ;
- i gn a yeu vaila sacwantès grandès batayes tins del guere di 1870 et del guere di 14: bataye di Revigny an 1914; del Tchampagne an 1914-15; di Vauquois di 1914 a 1918; di Verdun an 1916-17; ofinsive di Mouze-Årgone an 1918.
L' Årgone si stind a pô près d' nonne a bijhe, inte l' Årdene a bijhe, li crowe Tchampagne et l' aiwe d' Inne å coûtchant, eyet li Bårwès et l' aiwe d' Aire å levant.
L' Årgone si trouve dins l' bassin d' l' aiwe di Sinne, ca bén k' elle est djondant l' valêye di Mouze.
Li contrêye n' a k' des bas tienes; ele monte djusk' a 350 metes hôt.
Li grandeu des bwès a bråmint candjî avou l' tins; ene pårteye des bwès k' on voet å djoû d' oûy a stî rplanté dins les anêyes 1920 po rfé les distrujhaedjes del guere di 14.