Adolphe Hoyaux

Adolphe Hoyaux (k' on loméve «l' Aveule di Djolimont»), c' esteut on scrijheu e walon ey èn eplaideu do payis del Lovire.

I skepia a Famiyureus li 15 di djanvî 1854 et mora 1928.

Vicåreye

I bouta tot djonne, a 10 ans, dins èn aminwer del Croyire. Pu dischinde e beur come houyeu a Sint-Piére. Adon-pwis, dins ene fayinçreye.

A 24 ans, i divna aveule. Il est maryî avou deus efants. Sins s' discoraedjî, il aprind l' alfabet Braye eyet l' muzike. Et divni muzicyin dins les cåbarets et so les dicåces. C' est vola k' il aprind a rmete e walon des tchansons francesses.

Tins des greves di 1886, pu pol procès Dufuisseaux (1889), i toirtcheye des tchansons politikes, e francès ey e walon, todi po disfinde les ovrîs grevisses et les socialisses.

Ouve e walon

I scrijha ene grosse trintinne di tchansons e walon.

Egzimpe di boket

Fuziyåde di Rou-dlé-Tchålerwè (1886)

Li rvindje des grevisses

I.

Mes cpagnons, dji vos va tchanter

Çki nos va bénrade ariver

Wai çki nos fjhèt vir, tos les grands patrons

Tins k' zels ramassèt do bea et do bon.

Mins il est grand tins d' nos rvindjî.

Waitîz çki nos pind dvant les iys.

Bén seur, si nos n' nos rvindjans nén (nîⁿ)

K' i nos vont mete dizo leus pîs.

II.

On s' è va a s' djournêye å matén

Avou deus setchès tåtes di pwin.

La, on nos comande tot d' triviè (trèvîⁿ)

Pask' i nos prindèt po des tchéns (tchîⁿ)

S' on a l' måleur di replikî

On dit k' vos estoz revoyî.

«Alez rcweri vo livret».

La come nos stans comandés.

III.

Si nos stans ene cwénzinne e rtård

On nos atake e tribunå.

La, on nos oblidje a payî,

Cwek' on sait bén k' nos n' sårén nén (nîⁿ)

Po ene ogmintåcion d' salåre, (salaire)

Fjhèt come å Rou u a Carniere

On voye des escadrons d' sôdårds

Et on fwait tirer so des sclåves.

…