Aller au contenu

Armand Ledoux

Èn årtike di Wikipedia.
Armand Ledoux
portrait da Armand Ledoux
Skepiaedje11 di måss 1880, Angleur
Moirt1955

Armand Ledoux, c' esteut on scrijheu e walon do Payis d' Lidje, purade on fjheu d' tchansons.

I vna å monde li 11 di måss 1880 a Angleur. I mora e 1955.

I rashonna céncwante di ses ouves, et ls eplaidî dizo l' tite: «Djoyes et sintimints» (1925).

Corwaitaedje di ses ouves[candjî | candjî l’ côde wiki]

Si prumî tecse «Mi paradis sol tere» a stî prezinté å cåbaret walon d' Lidje (li ci k' a rataké e 1908). Guillaume Loncin, k' aveut-st enondé l' cayet, dijha d' lu adon: «Vocial on novea. C' est on vraiy tchansonî. S' i scrît totès tchansons come li cene ki dji vén do lére, vos m' poloz croere. I dvénrè ene sakî ».[1]

Come di djusse, li scrijheu tchante aprume l' amour, avou l' côp d' cote…:

Li prumire feye ki dj' l' a veyou,
Dji sinta ki dj' esteu pierdou
Ca si imådje m' a tofer shuvou !
Por mi, n' a nole pareye
Ki leye !

… pu l' vicaedje eshonne, tot prindant asteme ås pinsêyes di l' ôte

A cwè tuzez vs, mi ptite Mareye
Tot loucant pidjoler l' påwion ?

… mins, eto, avou ses coûtès djoyes:

Mayon, pocwè m’ avoz cwité ?
Dji vs aveu dné l’ meyeu d’ mi åme
Et cwand vs m’ avoz veyou plorer,
Awè, vos avoz rî d’ mes låmes.
A ! dji rgrete li tins d’ nos amours
Ki fjhént l’ bouneur di m’ vicåreye.
Mågré ki vs m’ avoz broyî l’ cour,
C’ est vos ki dj’ inmrè tote mi veye !

Ses tchansons sont pacô filozofikes:

Dabôrd k' i fwaiye oneur a ses afwaires,
Li ci k' overe si conte pus ritche k' on rwè.

Mins i shût les idêyes del bordjoezeye di s' tins, rimontêye disconte li comunisse, ki vout l' ewalisté inte les djins:

L' ewalisté amoenne tofer des dvizes.
C' est l' destinêye et l' consyince ki fwait tot

Portant, come tchansonî, i n' est gote capitalisse:

Nozôtes, tchansonîs, dji vs el di d' avance,
C' est nosse cour ki djåze divins nos tchansons.
Çou ki nos fwait scrire, ci n' est nén les çanses;
Neni, c' est seulmint l' amour do walon.[1]

Sourdant[candjî | candjî l’ côde wiki]

  1. 1,0 et 1,1 Charles Steenebruggen, adrovaedje do live «Djoyes et sintimints».