Charles Massaux

a l' erî-plan, diviè 1997, tins k' il aprestêye ene emission po "900.000 Walons

Charles Massaux (sovint spoté li grand Châle u Monsigneur; i sene eto li Chwès arnåjhe u Charles-Joseph de la Grange), c' est on scrijheu e walon ey on bouteu pol walon.

Il a skepyî a Nameur li 26 d' octôbe 1934 ey a morou li 22 d' djanvî 2022 a Tornè.

• 
  2009
• 
  2013

Ouve pol walon

C' est lu k' a-st enondé li gazete Li Chwès e 1995.

Il a eto fwait des sketchs, dizo l' no di li Grande Djelike.

Il a stî sovint «Rwè des Minteus» (li wangnant d' ene bate di dijheus d' mintes a Nameur).

Il a eplaidî on live di rcetes del Province di Nameur (2002).

Il a eto rashonné des vîs tecses da Joseph Calozet, eyet fé ene ramexhnêye di ses scrijhaedjes.

Tot seu, il a rexhou des lives a môde di sillabusse : "Dji m' sovén" (1993), on live di sovnances ki mostere des portraits d' viyès djins. I continowe avou "Li gazete do payis d' Nameur" e 1993 et 1994.

E 1996, i vude ene ramexhnêye di tecses (francès et walon) sol Rascråwe do Bwès do Cazî : "Il était 8 heures, le 8 août 1956 à Marcinelle".

Il a scrît les bouyotes di des ptitès bindes d' imådjes, Ågusse et Fifine ki l' prumî albom a rexhou e 2007.

Châle Massaux pout esse riwaitî come onk des cis k' a l' pus scrît e prôze nén racontrece dins les anêyes 1990 et les anêyes 2000.

Foû des scrijhaedjes, il a eto stî on cåzeu å posse, metans dins l' emission 900.000 Walons. Mins eto dins les libès radios, a «Radio Chevauchoir» et «Radio Fugi» (Djivet). C' est dins cist ocupaedje la k' il aparexhe dins l' fime di racsegne da Zavî Istasse «Li langue åd dibout del linwe».

Il a eto adjinçné li fiesse Calozet di teyåte e walon po les djonnes.

Il a ratourné e walon li Tintin «Les ôrreyes del Castafiore».

Djudjmint sor lu

Il a beacôp ovré lu tot seu, a môde d' «electron libe», mins il a-st ovré timpesse pol walon.

Alére

• Michel Piette: "Châle Massaux, on Chwès ene miete arnåjhe", Li Chwès fevrî 2008.
• Mahin Lucien: Waloneus revoyes, Li Rantoele l° 101 (bontins 2022), p. 17.

Hårdêye difoûtrinne

Li pådje då Grand Tchåle di Nameur] (so l' Aberteke)